以下整理出教育部推薦用字無做分別（抑是收了無十全[tsa̍p-tsn̂g]），將兩个詞素，攏寫做共一字，但是我個人有分開寫个一寡台語漢字。毋是欲堅持我个寫法才是「正確」个，重點是欲予各位卡清楚來了解台語一寡相關个語音佮意義个關係，按呢用漢字寫台語，才卡袂出現予儂讀袂好勢，甚至家治日後嘛讀毋著去个情形。亦著是講，咧寫个時，著愛意識著某種寫法，可能會造成啥乜誤唸、誤解，代先用加注音標、解說、標點等等个方式來預防。
欲看以下个討論進前，有一个基本觀念愛先說明一下。著是台語音个層次足豐富，一字多音[it-jī to-im]个現象（一个漢字，有幾若種呼音）足普遍，包括文白異讀、本音/訓讀、聲調勾破、腔口差別，甚至閣有正音/俗音个分別。其中上捷拄會著个是文白異讀，愈四常个字愈濟文白異讀个情形。原則上，有文白異讀个所在，是採用共款个漢字寫法，才根據伊出現佇啥乜語詞，甚至考慮規句話來決定欲唸文音抑是話音。
親像「生囝毋是人生唯一个意義」，「生囝」个「生」唸白話音 senn (漳腔，若泉腔是 sinn)，第二字，「人生」个「生」唸文言音 sing。閣像「生理䆀，歹生活」。第一字「生」唸文音 sing，第二字「生」唸文音 sing，抑是話音 senn/sinn 攏會使。閣像「生物即科，伊卡生疏」，第一字「生 sing」，第二字「生 tshenn漳/tshinn泉」。這只要是母語儂(native speaker)，小可仔訓練一下，真緊著掌握會好勢。若iá閣有歹決定文白个所在，才閣補注音標。親像「天反地亂 thinn-huán-tē-luān」「天翻地覆 thian-huan# tē-hok」。
這是欲用漢字為主來寫台語，所需要付出个學習負擔（其他个漢語，文白異讀加足少，即種學習佮使用个負擔相對卡低）。亦有台語文推捒者，採取卡極頭个做法，將常用个文白異讀攏分開用無共款个漢字來寫，可比講黃元興先生著是按呢，伊「生囝」寫做「甡孖」，「生理」共款無變，「生疏」寫做「青疏」。其他个常用字嘛攏按呢處理。
為著欲分別文白異讀，硬將本質上共款个漢字（而且是足常用、足簡單个字），勉強拆開寫做無共字（變成足罕見、足奇怪个字），為著欲學習即堆無共款个寫法，顛倒愛付出閣卡大个成本。按呢頭卡大身，毋是頭路。
我以下分開寫个用字，大部份，毋是即種文白異讀个情形；有小部份是，毋過是閣卡常用个虛字，若無分開寫，抑是加注音標來輔助（抑是規氣直接寫羅馬字），足容易造成困擾，或者是雖然算是文白異讀，但是意思已經引申、演化甲差傷遠，iá是分開寫卡妥當。
------
一、「儂 lâng、人 jîn」，推薦用字攏寫「人」，「人 jîn」並無 lâng 个白話音。lâng 寫做「人」是訓用。
例句：
1. 選舉著愛重視人才[jîn-tsâi]，卡大過重視儂才[lâng-tsâi]。（人才是品格、能力、學識；儂才是容貌、體格、儀態。）
2. 大人[tāi-jîn]命令庄裡个大儂[tuā-lâng]攏愛來鬥修理護岸[hōo-huānn]。
二、「咁 kám、敢 kánn」，推薦用字干焦有收疑問詞「敢 kám」，目前猶無收助動詞 kánn。這將來應該愛收，無論欲分開寫抑毋，攏愛有清楚个交帶，才是負責任个做法。
例句：
甲：「咁[kám]是阿三偷提个？」
乙：「敢[kánn]是őo！」（真有可能是，表示一種猜測、判斷）
丙：「咁[kám]是？」（無猜測、判斷个意思。是表示疑問，有時是反問）
三、「這 tse、即 tsit」，推薦用字攏寫「這」。
例句：
1. 這[tse]桌共我搬入去。（tse 唸本調。華語：這桌子給我搬進去）
2. 即[tsit]桌共我搬入去。（ tsit 唸變調。華語。這桌（酒菜）給我搬進去）
用「即」表示 tsit，著愛注意，有時「即時陣 tsit sî-tsūn」个 tsit-sî 會佮「即時tsik-sî」分卡袂清，需要加注音標。
四、「彼 he、迄 hit」，推薦用字攏寫「彼」。
例句：
1. 彼[he]車是啥儂个？（華語：那輛車是誰的？）
2. 迄[hit]車是啥儂个？（華語：那車貨物/東西是誰的？）
五、「勿 mài、莫 bo̍h」，推薦用字干焦收 mài，寫做「莫」，並無收 bo̍h。「莫」文言音 bo̍k，白話音 bo̍h。
例句：
1. 勿[mài]去卡好。
2. 莫[bo̍h]得去卡好。
「莫 bo̍h、莫得 bo̍h-tit、莫應 bo̍h-ìng、莫講卻 bo̍h-kóng-kioh（何況个意思）」个講法，台灣強欲失傳去矣，扑算推薦用字个制定委員嘛無幾个儂會曉講 bo̍h，所以怹袂感覺 mài 寫做「莫」有啥問題。請參考教育部「台灣閩南語按呢寫」第376期，採用「莫」來寫 mài 个解說。
六、「就 tsiū、著 tio̍h/to̍h」，推薦用字攏寫「就」，亦著是用「就 tsiū」來訓讀做 tio̍h/to̍h。這有好有䆀。古早台語文獻定定有講「就[tsiū]是、就[tsiū]好、食飽就[tsiū]去」，即種講法，現代台語儂多數攏講 「著[tio̍h/to̍h]是、著[tio̍h/to̍h]好、食飽著[tio̍h/to̍h]去」。這可能是泉/廈腔佮漳腔个差別。泉/廈腔講「按呢 就著[án-ni tsiū tio̍h]」，漳腔講「按呢著著[án-ne to̍h tio̍h]」，副詞 tio̍h 往往簡化做 to̍h。即組詞，問題真大，佇遮無詳細討論。
七、「扑 phah、拍 phik」，推薦用字干焦收卡常用个動詞 phah，寫做「拍」；無收名詞「拍 phik」。
例句：
1. 手提拍板[phik-pán]，咧扑拍[phah-phik]唱南管。
2. 俗語講：戲館邊个豬母，袂吹蕭嘛會扑拍[phah-phik]。
3. 佇寺院內，食飯時間若到，著扑板[phah-pán]叫逐家來食。
因為 phik 絕對是「拍」--字，所以推薦用字按呢做，等一是講 phah-phik（扑拍），著寫做「拍拍」，但是按呢又閣佮「扑扑[phah-phah]--咧」僫分別啦。
八、「䊩 phun、潘 Phuann」，推薦用字 phun 寫「潘」，佮儂姓「潘 Phuann」無分。
「潘」 是上古著有个字，原意是洗米水，台語講 bí-phun。台語个phun，除了洗米水个原義，進一步引申做予豬仔食个「廚餘、賰飯菜」。「潘」後來用做字姓。為欲佮洗米水做分別，古早儂早著另外造一字「䊩」，這佇金代韓孝彥所做个字典《篇海》著有收，「䊩」即字个存在，起碼有九百年以上个歷史，無應該閣復古轉去到東漢《說文解字》無分別个時代。
小弟姓「潘 Phuann」，毋是姓「䊩 phun」，無論徛佇公抑是私个立場，我攏強烈主張「潘 Phuann」佮「䊩 phun」愛分開寫！XD
九、「峘 kuân、懸 hânn/hiân」，推薦用字干焦有收卡常用个 kuân（kuân-kē 个 kuân），寫做「懸」；無收 hânn。推薦用字制定委員可能多數袂曉講 hânn；若無，著是認為 hânn 無常用，無要緊，加注音標來分別著好。
例句：
1. 台灣真濟峘山[kuân-suann]。
2. 日頭又閣懸山[hânn-suann]。（日頭teh欲落山，予山閘著一部份，看起來袂輸懸掛[hiân-kuà]佇山陵[suann-niā]，叫做「懸山 hânn-suann」，這是足雅氣个台語詞！）
3. 代誌懸[hânn]咧，無解決。（事情懸而未決）
十、「較 kàu、卡 khah」，推薦用字無分。
例句：「有分，比較卡好」（若按照推薦用字著寫做「有分，比較較好」）
但是我按呢做，khah 寫做「卡」，會佮推薦用字另外个「卡 kha̍h」，兩个詞素攏寫做「卡」，這愛用羅馬字來幫助分別。
例句：
1. 按呢卡[kha̍h]袂椆。（華語：這樣卡不住）
2. 按呢卡[khah]袂椆。（華語：這樣比較不牢）
十一、「若親像 nā tshin-tshiūnn、哪親像 ná tshin-tshiūnn」，推薦用字 ná / nā 攏寫「若」，ná 是「宛如」，nā 是「如果」。
例句：
1. 若親像即範[pān]个，欲thah有路用？
2. 哪親像即範个，才有合用。（「哪親像」著是「親像」。「哪」佮「親像」意思差不多）
十二、「啥乜 siánn-mih/mí、啥物 siánn-mi̍h」，推薦用字攏寫「啥物」。
這泉州腔分卡清楚，華語〔什麼〕，台語泉腔講 siánn-mih；華語〔什麼東西〕，台語泉腔講 siánn-mn̍gh。「啥乜、啥物」有足濟腔口變化，佇遮無憑頭仔列出來。即組詞，問題真大，佇遮無閣探討。
十三、「牢 lô、椆 tiâu」，推薦用字 tiâu 寫做「牢」，無另外收「牢 lô」个字音。
例句：
1. 關儂个所在叫做「監牢 kann-lô、監獄 kann-ga̍k/gi̍k」；關豬關牛个所在叫做「豬椆 ti-tiâu、牛椆 gû-tiâu」。
2. 伊佇監牢內苦讀，最後考椆大學。
十四、「相共 sio-kāng、相仝 sio-kâng」，教育部將 kāng 佮 kâng 當做又音字，攏寫做「仝」。毋過，tàu-sann-kāng 个 kāng 伊寫做「鬥相共」。
「相仝 sio-kâng」佮「相共 sio-kāng」共意思。但是阮講「共款 kāng-khuán」，無講「仝款 kâng-khuán」，所以我寫做「鬥相共[tàu-sann-kāng]、共款[kāng-khuán]、相共[sio-kāng]、相仝 [kâng]」。
我即種寫法，會拄著一个問題：「共一个儂」有時愛唸做 "kā tsi̍t-ê lâng"，有時是 "kāng tsi̍t-ê lâng"，愛閣看上下文去判斷，我以後可能iá是照教育部个寫法。
十五、「抑是 iah-sī、或是 ia̍h-sī」，教育部當做又音字處理，攏寫做「抑是」。
例句：
1. 是汝抑[iah]是伊？
2. 是汝或[ia̍h]是伊？
3. 是汝或者[hi̍k-tsiá / hi̍k--tsiá]是伊？
「或者」个「或」是唸文言音。即个詞有儂講正常个變調，hi̍k-tsiá 兩字接後壁个「是」，兩字攏唸正常个變調；但是亦有儂唸做本調+輕聲 hi̍k--tsiá。
十六、「tang時、當時 tong-sî」，tong-sî 是「迄當時」，佮華語〔當時〕共意思；tang-sî 是疑問詞「何時」个意思。推薦用字疑問詞 tang-sî，嘛寫做「當時」。我聽別儂咧唸推薦用字台語文，佇遮定定唸毋著，所以規氣寫羅馬字。
例句：
1. 當時[tong-sî]欲扑契約，煞袂記得。（華語：當時要定約時，竟然忘了（某事）。）
2. tang時欲扑契約，煞袂記得。（華語：何時要定契約，竟然忘了。）
十七、「tann、今 kim / kin」，推薦用字攏寫「今」。「今」已經有「今仔日 kin-ná-ji̍t、今日 kim-ji̍t」兩个音矣，閣欲加負擔一个 tann 个音，我看真濟儂攏讀袂好勢，規氣寫羅馬字 tann，抑是漢字、音標並用。
例句：
1. 一去數年，至今[tsì-kim]並無音信。
2. 一去幾若年，到tann無消無息。
十八、「通 thong、通 thang」，推薦用字攏寫「通」，是文、白音个關係，我漢字嘛寫共款，但是定定愛加注音標來分別。
例句：
1. 按呢咁有通[thong]？（指道理上有通[thong]抑無通）
2. 按呢咁通[thang]？」（華語「這樣好嗎？」）
十九、「咧 leh/--leh、塊 teh/tè」，推薦用字干焦有「咧 leh」。
有一種 leh 是動詞片語个補語，親像「小等咧[--leh]、撫撫[hu]咧[--leh]、卡[kha̍h]椆咧[--leh]」。即種 leh 是唸輕聲，有儂講「固定低調輕聲」；有儂用「隨前變調輕聲」。
閣一種 leh 是助動詞，表示進行式，親像「伊咧睏、佮伊咧行[kiânn]（佮伊咧交往个意思）、巷仔口咧磅米芳」，這種 leh 一般是唸「輕讀再變調」，聽起來袂輸變做第一聲，其實比第一聲卡輕、卡短。即種 leh 應該是對 teh 弱化演變來个，即个虛字 teh 可能是名詞 tè （「所在、處所」个意思）演變來个，漢字寫做「塊」。
「伊teh食飯」是比「伊leh食飯」閣卡原始、精密个呼音（捌是我個人卡捷講个音），應該有一字來寫即个teh，毋是用卡無精密个變音「咧」來包含 leh 佮 teh 兩種音。推薦用字干焦收 leh，無收 teh，閃避即个問題。若教育部辭典，是兩音攏寫「咧」，無好。
名詞「即塊 tsit-tè」是即个所在，「來到塊 lâi kàu tè」著是「來到即个所在」。tè 閣對名詞，變做單位詞，像「一塊餅」个「塊 tè」。
二十、「大官 ta-kuann、大官 tuā-kuann」
「大官」唸做 tuā-kuann，有兩種情形，就一般台語來講，攏是指「真大个官員」，若就台語漳腔老派來講，另外閣有「翁婿个老爸」个意思，即種意思，泉/廈腔是講 ta-kuann。若是寫「美鳳=a怹大官毋肯」，這是指第二種意思，毋是指「真大个官員」。但是若干焦一句「大官毋肯」，無閣卡完整个上下文，咱就判斷袂出，上好加注音標。
二十一、「大家 ta-ke / tuā-ke、大家 tāi-ke」
繼續頂一條，若是相反詞「翁婿 个老母」个意思，著是「大家 ta-ke」（漳腔講 tuā-ke）。這有一寡困擾，因為華語文「大家」是稱呼每一个儂，即種意思，台語一般講「逐个 ta̍k-ê、逐家 ta̍k-ke（ke 攏變調做第七聲）」，但是亦有少數儂講「大家 tāi-ke」。所以「大家毋肯」，到底是逐个儂攏毋肯，抑是翁婿个老母毋肯？這共款愛加注音標。
二十二、「巧 kháu / khá / khiáu」
「巧」台語有三音：
文言音 kháu，例：「巧言令色 kháu-giân līng-sik」、「巧者，拙之奴。Kháu-tsiá, tsuat tsi lôo」、「巧婦難作無米之炊。Kháu-hū lân tsok bû bí tsi tshui」。
白話音 khá，例：「奇巧 kî-khá」「巧妙 khá-biāu/miāu」、「食巧卡贏食飽」。
特殊白話音 khiáu，聰明个意思。推薦用字只收即音。但是若出現兩字詞內底，有時分袂清應該唸三音中个佗一音。例： 「巧氣 kháu-khì」，麻煩、僫處理个意思，親像「巧氣病 kháu-khì-pēnn」。「巧氣 khiáu-khì」，儂真khiáu个性質。台日典有即兩詞，但是無收 khá-khì 个講法。
「巧裝 khiáu-tsong」，心適趣味，抑是聰明可愛个意思。
「巧神 khiáu-sîn」，靈巧；精神飽滇；身材舉止豔嬌美麗可愛。
咧寫漢字台文，拄著即種，愛顧慮著讀者會有困難，上好加注音標。
------
以上是推薦用字無分，但是我有分个一寡字（有小部份是漢字無分開寫，但是加注音標來輔助）。毋過，我無分「第一--个」佮「第一个」兩種 ê，漢字我攏寫「个」，只靠輕聲个雙連字號來分。這推薦用字有分開寫做「第一的」佮「第一个」。因為我足無愛借用北京話文个「的」來寫台語。即字个問題真大，佇遮無閣討論。這毋是矛盾，是同齊顧慮各種因素，am-lâi-tshé-khì 掠輕重，卡全面來思考个結果。
總是，世間事罕得有絕對，我猶原欲強調講，台語文學習者、書寫者，對台文个整體系統有原理性个掌握，比爭論個別个漢字按怎寫，閣卡重要。整體若掌握會好勢，著準各儂个用字有淡薄仔出入，彼此猶原足好溝通。嘛才會凍佇實踐[si̍t-tsián]當中，漸漸形成共識，予逐家个用字愈來愈一致。毋是像現此時按呢，台語音韻、系統啥乜攏毋捌，一篇台文攏毋捌寫過个赤跤仙仔、媒體記者，不時puh出來咧擾亂、唱衰台語文。
Comments powered by Disqus.