用心个日本觀眾予咱个啟示 [khé-sī]

日本个國家建設、文化經營、國民素養，予咱遮爾呵咾、欣羨。怹蓋重要个心理基礎，著是各行各業，毋管身份地位，儂儂攏是一點一劃，頂真稽考[khe-khó]、搭底研究，分釐毫忽[hun-lî hô-hut] 都無苟簡[kió/kóo-kán]，才建立起來个。

彰化彰藝園布袋戲團陳峯煙老師傅，講伊出國巡迴表演，逐國个觀眾，攏是看甲喙仔開開，大聲扑pho̍k仔 喝讚 爾爾[niā-niā]，獨獨日本儂，看了閣會一直問講尪仔是按怎且[tshiánn]，公子个手按怎褫[thí]葵扇，小姐个手按怎捋[lua̍h]頭鬃，老歲仔按怎攑薰吹 噗薰[pok-hun]，逐項問甲齊著[tsiâu-tio̍h]，欲愛知影背後个竅妙[khiàu-biāu]。

毋是家治个專業，日本儂尚且講究甲即款。總無咱有心欲鼓舞儂來學台語、寫台文个儂，會用得自滿、自限，無欲精益求精[tsing# ik-kiû-tsing]，用闊大个心量，來研究、吸收一切台語文相關个智識？

我真見笑，家治無半撇，姑不將嘛著講出即款話，來佮列位友志相敆[sann-kap]勉勵。