咱儂話 台語有「用人體部位來表示長度」，以下我先針對「手部」來舉例講--寡，若有重耽[tîng-tânn]个所在，拜託各位先進指正賜教。
1. 「指頭仔目 一目[ba̍k]長、兩目長」。指頭仔目[tsíng-thâu-á-ba̍k」華語是〔指節〕。
2. 「一掠[lia̍h]長、兩掠長…」。就我个語感是五支指頭仔牚[thìnn]開，對 指頭仔拇 到 尾指[bué-tsáinn]个闊度，但是有儂是算 指頭仔拇 到 指指[kí-tsáinn]（食指），也有儂算到中指[tiong-tsáinn]。生活應用，時常講「掠外長 llia̍h-guā-tn̂g」，就是大約比一掠較長个意思。
3. 「兩指[tsáinn]大、三指大、四指大…」，用手指頭仔伸直合做伙來比並[phīng]魚身軀个大細，若是大到五指，是講一手面大。
4. 「像指頭仔拇遐粗」、「像尾指遐粗」。比並棍仔、箠仔、藤條迄類个粗度。
5. 「一覆手水 tsi̍t phak-tshiú tsuí」像欲用電鍋煮飯，米洗好了後，清氣水愛貯到一覆水懸，手蹄仔平平搭佇米个表面，手骨拗直，予水淹到倚手目、手腕遐。
6. 「一尋[siâm]長、兩尋長」。一尋[siâm] 就是〔雙手環抱」个圓周長，用來算大欉樹身迄類个圓周，像「樹身兩尋大」，就是「兩儂攬[nn̄g-lâng-lám]个大樹」，華語〔兩人合抱的大樹〕。
當然，雙手向兩爿完全展[thián]開，親像將圓箍仔 hiù 直去，仝款嘛是一尋，像「一尋長个索仔」。正常儂个身體比例，其實一尋長差不多就是伊个身懸（身高）。
7. 「一儂徛，一托手懸」[tsi̍t-lâng-khiā, tshi̍t-thuh-tshiú kuân]。身軀徛直，閣伸手托向天，來算總懸度。用來量水深，抑是低厝仔个懸度。也有講做「一徛一拄 tsi̍t-khiā tsi̍t tú」。若閣較深个水有用「竹篙 tik-ko」來算，厝个懸度一般著算丈較精密。
8. 「手下節 tshiú-ē-tsat」做長度單位，我袂記得按怎講去矣，拜託先進指教，感謝。
Comments powered by Disqus.