發車、開車、駛車

看著標題即三个台語詞，請問讀者按怎理解伊个意思佮差別？請先想一下，才閣看落去。

即組語詞，是卜舉例來闡明(chian2-bing5)台語按怎予北仔話窘迫(khun2-pik4) 甲 uai-ko-chih8-chuah8。

發車 (huat4-chia1) 是發動 車个 en9-jin2，車閣停佇遐，無起行。北仔話是講【發動車子】。

開車 (khui1-chia1) 是共車駛起行，卜出發去某所在矣。可比講：八點準時開車。北仔話講【發車】。

駛車 (sai2-chia1) 是 drive a car，北仔話講【開車】。

所以，台語个詞彙系統，是先「發車」，時間到，才「開車」出發，佇路裡愛細膩仔「駛車」。按呢咁毋是真鬥搭？

有一寡心肝無平正(pinn5-ciann3)个儂，phuah8--去，想講「駛車」聽 tioh8 佮「屎車」共音，真粗，叫儂著愛學北仔話講「開車」。若 ka3 按呢，請問：北仔話个語詞有用著【屎】ㄕˇ个共音字个，遐爾儕，【使、駛、始、史、矢」是毋是嘛愛嫌講歹聽，攏著改講【開】，按呢才有公道。【使不得】改講【開不得】、【使用】改講【開用】、【大使】改講【大開】、【駕駛】改講【駕開】、【開始】改講【開開】、【歷史】改講【歷開】、【眾矢之的】改講【眾開之的】？

殊不知(su7-put1-ti1) 台語原底个開車是北仔話个【發車】，抑台語个發車，北仔話無兩字詞 thang1 用，卡囉嗦，講「發動車子」。若將「開車」代替「駛車」，本底个「開車」只好綴北仔話講「發車」，按呢到底只是發動 en9-jin2 抑是共車駛起行著歹分矣，結局著是破壞台語本成(ciann5) 真 ka1-nng5 个詞彙系統。

檢采讀者會有各(koh4)樣个語感，提出無仝个意見。各(kok4)儂語感差真儕，這嘛是一个消骿 (siau1-phiann1)个語言 四常 (su3-siong5) 个現象。