白話字是世界文化遺產

最近中國欲將福建个「白話字」，也就是用拼音來書寫閩南語、台語个教會羅馬字，向聯合國申請做世界文化遺產，中國將台灣个白話字文獻佮傳統，也當做福建白話字个一部份。

拆白講，中國申請白話字來做世界遺產，現拄現是有統戰目的。怹欲透過各種手段，來「證明」台灣个一切攏是中國个一部份（包括台灣原住民嘛講是上古對中國遷徙過來台灣島个），所以台灣著乖乖予中國統一才是天公地道（？）

台語欲獨立做「台語」，毋是列出伊佇語詞、語法各方面有偌濟佮「閩南語」無仝。是愛建立台語个主體觀念，佇台灣个台語，就是以台灣在地个講法當做標準，毋是以廈門話、漳泉話做標準。

清朝尾、日本時代佇台灣出版个台語文獻、教材，有袂少是用廈門話來做正式標準，但是戰後，台語確實有家己个主體性矣！

仝款道理，台灣白話字，欲成[tsiânn]做台灣个文化遺產，也毋是相諍講台灣比福建較早出現白話字，是愛看伊佇台灣个傳播、保存、研究、特色、佮影響。

親像日本、韓國、越南也有一大堆文化遺產，源頭是中國來--个仝款，總--是，中國無資格將日、韓、越个文化算入去中國个一部份。台灣因為無獨立過，但是有必要獨立佇共產中國以外，所以才著遮辛苦咧爭取。

民主台灣若予共產中國統一去，是世界所有華人个大不幸！咱台灣儂用六、七十年久，斟酌觀察當代華人个本質，也著愛覺悟講，做華人無較光榮，咱毋免做華人，閣較無應該做政治大一統个共產中國人民。