稽考台語字音，無應該直接跳起去中古韻書

欲探討書面語漢字个台語音，無應該未曾未就跳起去古韻書，家治來做考證、擬音，應該先參考老一輩漢文讀冊儂个唸法，閣有台語字書，親像彙音妙悟、雅俗通十五音、彙音寶鑑个記載。有疑問、衝突个時，才參考古韻書來做比較、考證。

台語雖然保存真濟古音，尤其是台語文言音雖然佮中古漢語音韻關係密切，但是並無迄種「完全存古」个代誌，這是無可能个。唐詩用閩、台語來讀，無論採用佗一種腔口，有時卡按怎唸嘛是袂凍完全鬥句，只好特別去拗句尾字音來唸予伊押韻，但是若咧讀散體古文，著愛閣回復「正常」个字音。像「少小離家老大回，鄉音無改鬢毛衰，兒童相見不相識，笑問客從何處來」，「回 huê、衰 sue」有押韻，但是佮「來 lâi」袂鬥句，只好拗做「回 hâi、衰 suai、來 lâi」。

而且，古韻書有个是綜合當時各種方言來做抽象个整理歸類，當做寫詩押韻个折衷標準，但是並無忠實反映當時个官話抑是某一種活語言。

綜合以上所講，咱thang知：直接跳去到古韻書，來反切台語文言音，欲當做咱現時个發音根據，毋是理想个做法。

若論到台語白話音，彼就愈複雜，古韻書只到中古音个層次，但是台語白話音有殘存袂少上古音个成分，欲完全用中古音韻書來歸類、對應，無伊法！

(2012-09-10 facebook)