「紗窗」个台語

「修理紗窗、換玻璃……」毋知自tang時起，著開始有儂駛發財仔車出來巡街踅巷[sûn-ke se̍h-hāng]，鬥放送頭咧鼓舞，做即種到厝修理門窗个服務。二十年來，我聽著个，雖然是無共儂咧放送，但是怹「紗」--字攏唸做 sua。

「紗」个台語，文言音是 sa，白話音是 se，像「綿紗mî-se、膨紗phòng-se」。即字根本無 sua 个音，是按怎怹欲按呢唸？這是受著「砂、紗」華語共音个影響，怹个直覺掠叫講「紗」个台語嘛佮「砂sua」唸共音。

但是我相信怹若欲講「綿紗、膨紗」，一定袂唸毋著。因為這是頂一代著流傳落來个日常話。毋過「紗窗[se-thang]」對怹來講是新詞，怹無愛講口語个「蠓仔窗[báng-á-thang]」，欲學華語个用詞，但是字音閣呼袂正，誠害。

其實古早閩台地區著有「紗窗[se-thang]」，但是彼是好額儂做來看媠个物件，一般人家無咧用。

經過二十年久，今仔日下晡總算予我聽著「修理紗仔窗[se-á-thang]、紗仔門[se-á-mn̂g]」！予我感動一下，險仔衝落去樓跤叫伊來共我修理好好个門窗。