幾工前，後學有寫一篇〈〔潛水艇〕个台語〉，講著台語因為無規範化，致使一寡新事物，講法傷濟種。不過我無講个是，台語也因為無機會得著政府个支持來傳播，所以雖然有遮爾濟種講法，煞連一个嘛無時行，目今一般台灣儂逐種講法攏足生疏。當然迄種「新事物」，是欲倚一百年前著出現个，所以台語猶閣有通講，若是戰後引進个物件，無論是食穿用个日常名詞，抑是專業語詞，有足濟足濟，根本台語攏無相應个講法。我迄篇个結論是：「咱愛責督政府，成立台語文化委員會，其中一項要緊个工課，著是整理舊詞、制定新詞。」毋但按呢，咱嘛愛要求政府全力个支援，來推廣遮个台語新詞，才有法度予台語綴會著時代个跤步，予伊袂予時代淘汰，袂予人民棄捒，會得繼續生湠。
我迄篇文，承蒙[sîng-bông]洪惟仁教授佇 facebook 回應講：
『台語現代化、標準化是一項重要的工程，杜部長在位的時有咧做。新詞包括物理數學的學術名詞攏有研究欲制訂，我有參與著。馬政府上台著了後著停工矣，這項空課著hânn（懸）咧到今。
但是愛注意：一、啥儂有資格來做這項空課；二、假使做了若無用，媒體無欲用，教師無欲用，學者無欲用，按呢嘛無彩工。』
關係洪教授寶貴个意見，我感覺網路時代个新進展，會使提供咱新思維：
佇 web 1.0 个時代，只有少數儂才是內容个提供者，其他多數个社會大眾，只是被動个資訊消費者。到 web 2.0 个時代，儂儂攏是資訊的生產者佮消費者，會凍佇網路平台進行密切、即時个身份轉換佮互動。到 web 3.0 時代，網站佮網站、軟體佮軟體之間，嘛會凍真方便來進行各種「有智慧」个互動，成做一个有機个「語義網路」(semantic web)。
過去个語文規範者迄種「我輩數人，定則定矣 [ngóo-puè sòo-jîn, tīng tsik tīng--í]」个運作模式，佇民主時代、網路時代，恐驚袂赴市矣。我設想一个閣卡扭掠[liú-lia̍h]个法度：
初步个做法，咱會凍建置一个「台語新詞擬定網」（是虛擬[gí]个概念，將來網站个運作，往往攏是分散个，毋是集中个），將各領域，關心現代台語文前途个人士khoo倚來，其中包括佔少數由公家付費聘請个領域專家、台文專家佮資料管理者，閣有佔多數个社會人士（透過相當開放个認證方式，予怹加入做會員）。
先由一寡个台語文研究者，來整理、擬定出台語制定新詞个各種法度。閣再來，結合專業人士，就最常用个領域術語，佇遮个法度个基礎頂面，大概討論出一个台語對應詞个草案，即時將建議詞佮理由公佈出來，開放予會員逐家來評論、提議別種講法、揤[tshi̍h]「讚」、加添新詞目等等。網站當然嘛愛提供真方便个搜揣[tshiau-tshuē]功能，予全體民眾，攏隨時會得簡單來查出建議詞、「上『讚』个詞」（得著上濟儂揤「讚」个講法）等等。建議詞嘛會凍佇一段期間了後，根據一寡原則、條件來變更。
簡單講，語文是人民大儂个語文，透過網路技術，咱會使量早將民主精神加入制定新詞个程序內底。
毋但按呢，免閣偌久，一日千里个web 3.0相關技術，會凍真方便來自動交流網路資訊。可比講，針對某一个術語，我个網誌文章是採用某一个台語講法，抑別儂个論文是採用另外一个講法，遮个攏會凍透過 API (應用程式介面）个使用佮授權，將實際採用个情形，自動回報轉去予頂面迄个「台語新詞擬定網」，來進行「擬定佮使用新語詞」雙向密切个良性互動，包括自動統計出「人氣詞」（實際上濟儂採用个講法）。
後日新加入个使用者，嘛毋免閣一个仔一个詞條，慢慢仔去查，才會曉寫作專業領域个台文，伊會凍利用「細隻軟體機器儂」（網路App/API），自動來替伊將華文術語抑是英文術語，自動取代做台語術語（隨在使用者指定欲用「建議詞」、「上『讚』个詞」抑是「人氣詞」。
即種利用網路技術來進行新時代、新語文「約定俗成」个大事工，是一種非常有意義个文化革新。本來我是想講，著愛「制定」新詞，但是咱若採用以上所講个運作模式，卡鬥搭个講法，檢彩是講，咱來「擬定[gí-tīng]新詞」。「擬議[gí-gī]」个過程，已經比古早閣卡開放；「定案」个過程，閣卡民主，是根據實際採用个累積結果。
當然，國家个語言政策，猶原愛大力來保護、獎勵台灣本土語文个使用佮流通，按呢社會大眾才卡有動機，歡喜來利用母語文。以上所提說个運作方法，才有成功个機會。
Comments powered by Disqus.