「緯」字台語音

教台典「緯」字只收一音 uī，這有合中古音：「【廣韻】【集韻】【韻會】于貴切【正韻】于位切，音胃。」彙音寶鑑也是收 uī。

但是得著第二屆醫療奉獻獎个謝緯醫師、牧師(1916-1970)，過去白話字教會公報提起伊个大名有十六篇文，若毋是寫做 Chiā Huī（九篇），無就是寫做 Siā Huī（七篇），並無寫做 Chiā Uī 抑是 Siā Uī，嘛無寫做 Chiā Uí 抑是 Siā Uí。

Huī 也是甘字典唯一音。

「緯」若欲唸上聲 uí，佮「偉」仝音，這毋是台語傳統音，不而過中古音韻書《集韻》有收做異讀。康熙字典：「又【集韻】羽鬼切，音偉。【博雅】束也。【夏小正】農緯厥耒。」「緯」唸做「偉」个音，看起來毋是咧指經線、緯線[huī/uī-suànn]个「緯」。

「北緯」自細漢聽著台語新聞攏講 pak-uí，這毋是氣象主播會曉用集韻「羽鬼切」去推[tshui]台語音，我相信伊只是比照華語「偉、緯」唸仝音个做法，將台語「緯」也當做「偉」个仝音字看待爾爾啦。

「北緯」佇台日典（臺日大辭典）有收，兩字攏唸文音 pok-huī。佇白話字教會公報 1965.05 有寫著 pak-huī：

Kó͘-chá lâng khoàⁿ sit ji̍t (日蝕) choè thang kiaⁿ ê pháiⁿ tiāu-thâu, sī Siōng-tè ê kéng-kò. Sū-si̍t B.C. 763 nî 6 ge̍h 15 ji̍t tī pak-hūi (北緯) 38－39 tō͘ ê toē-tiám ū toā sit ji̍t (皆旣日蝕).

以上引文內底个漢字是原刊就有。改寫做漢字如下：

古早儂看失日做通驚个歹兆頭，是上帝个警告。事實西元前763年六月15日佇北緯38-39度个地點有大失日。