縛跤 [pa̍k-kha]

列位扑算捌佇網路看過清朝有縛跤[pa̍k-kha]个婦人儂相片。彼是中國極䆀个風俗，對南宋就開始時行，到清朝哪久哪離經。詳情遮免講。

清朝尾受西洋文明个影響，中國儂才漸漸棄捒即个惡俗。咱看當年基督教會个文獻，親像閩南白話字「漳泉聖會報」，就知影傳教士用盡心神，設立機構（像「戒纏足會 Kài tiân-chiok hōe」），來苦勸中國百姓著愛【㨨跤 liû-kha】。

【㨨】動詞，是指將纏踅椆咧，長長个帶仔迄號个物敨開。【㨨跤】就是將纏佇雙跤个【跤帛 kha-pe̍h】（華語裹腳布）敨開（解開），穿特殊个【㨨跤鞋】來保護受盡傷害个跤。

這著看款跤pô 變形个程度，有个足嚴重，已經【折龜 tsi̍h-ku】，就是咱佇相片看著迄種形，若㨨跤，根本袂行路，就無法度共伊㨨。

欲倚千年久个漚風俗，佇幾十年間就廢除，這是西洋基督教文化對腐化變態个中國民俗重大个貢獻。

雖然縛跤个風俗已經廢，有一句趣味个俗語留落來： 【愛某媠，共某捀跤桶水；愛某白，共某洗跤帛。】 Ài bóo suí, kā bóo phâng kha-tháng-tsuí; ài bóo pe̍h, kā bóo sé kha-pe̍h.

註：
一、台日大辭典有收【折窩 tsi̍h-u】，無收 tsi̍h-ku，這是我佇 1896 年八月个【漳泉聖會報】內底學著个，伊攏寫廈門話羅馬字，漢字【折龜】是我家己想个。兩个詞攏是形容縛跤了後个變形，應該是仝一个詞个無仝腔口。後來我佇日本時代名著，片岡巖先生《台灣風俗誌》(1921) p.112 看著伊漢字寫「截龜」音標是チイ クウ（伊無標調），伊即本冊顛倒佮漳泉聖會報仝款，佮台日典無仝。

二、【㨨】無限定用佇㨨跤，親像講：
「豬牛精牲予人類 tshiah血 liô肉、破腹㨨腸[phuà-pak liû-tn̂g]，死去真苦慘。」就是將伊腹肚內纏踅椆咧个腸仔 giú出來。

（2013-06-05 先發表佇 Facebook）