迒予過，予汝富[pù]袂退

有一陣疼惜台語个朋友去採訪一位蹛佇雲林褒忠个陳女士。 老大儂講著婚俗，新娘入門愛迒[hānn]烘爐，邊仔个媒儂愛講好話：

Hānn hōo kè, hōo lí pù buē thè.

迄句話个漢字是：「迒予過，予汝富袂退。」

老大儂解說講：「Pù，少年仔講『予汝發[huat]』就著啦！」

結果，採訪者煞將「pù 袂退」理解做「一直 puh 起來，puh 袂退！」

儂是講 pù，毋是 puh 啦！雖然老大儂有講著本調 pù 个音， 但是伊用「予汝發[huat]」來解說，扑算採訪者一方面是毋捌「富」有白話音 pù， 一方面可能想對教典「發」字有唸做 puh，雙重因素加起來，就誤解矣。

pù 是「富」个白話音，「富」个文言音逐家知，唸 hù，但是白話音 pù 現代台灣儂就足生疏矣。台日典收真濟「富」唸 pù 个俗語，有興趣个朋友， 請家己去查。

老大儂閣講：「即馬到這廳口，創一个烘爐，一塊瓦[huā]， 按呢入去按瓦[huā]共踏予破。講： Huā# phuà, lâng# bô phuà（瓦破，儂無破）。」

「瓦」字唸 huā，是泉腔，台灣優勢腔講 hiā。 「儂無破」，受訪者是解說做「愛好額，毋才袂破財啊。」

以前个儂較迷信，足驚娶著八字【帶破 tài-phuà】个新婦。另外， 儂个身體抑是性格有嚴重个缺點，嘛算是「破」。按怎算「嚴重」， 古早儂个認定佮咱想个無仝。新婦若予儂嫌講是「破格查某」 彼[he]一世儂就悲慘矣！

世間無完人[uân-jîn]，儂儂攏有缺點，所以俗語也講「一儂帶一破」 [Tsi̍t lâng tài tsi̍t phuà]。

補充：

我即篇佇面冊個人動態鋪出來了後，朋友來留言，分享伊親身个見聞。 簡單講，若欲結婚个時，發生一寡無平安个狀況[tsōng-hóng]， 新娘就會予ta-ke厝个儂嫌講帶破。這是真無辜，也是真無 tā-uâ 个代誌！