羅肇錦教授有一篇文〈「台語」是讓人不安的稱呼〉2011年以來，一直掛佇中華民國客委會个官方網站，即篇文有真濟似是而非个資料、矛盾个主張，但是也是反對「台語」名稱个儂重要个論證根據。
明明先有「台灣話、台語」个名稱，國民黨來台灣，才強迫台語改號做「閩南語」，伊煞顛倒頭，講「台語」是取代本來「閩南語」个正確講法。
伊有兩大理由，不准阮个話號做「台語」，著愛改做「閩南語」：
以「台語」或「台灣話」來代表閩南話，犯了以偏蓋全、以大吃小的謬誤，這個稱呼有兩個盲點：
第一，內涵上並不符合台灣所有的語言，容易引起原住民、客語等族群的不滿；
第二，對廣大的閩南話不利。因為使用台灣話來代表閩南話，就自外於其他地方的閩南話，如海外的閩南話，如福建各地的閩南話，他們不可能稱他們的閩南話為「台灣話」的。因此以台灣話代表閩南話，是自我減弱語族勢力，自我縮小語言疆域的矮化做法，殊不足取。
先反駁伊第一點理由：伊身為客家人客語學者，竟然完全無視閩南也有客家，閣有畲族存在个事實，硬欲將台語改號做閩南語，咁講就毋是以偏蓋全？閩南个客族、畲族就袂不滿？台灣嘛有閩南漳州府詔安客家族，怹嘛會使主張講「阮台灣詔安客話嘛是『閩南語』，嘛是『台灣閩南語』」。
第二點閣較離經，真多謝伊个家婆，阮根本無想欲代表閩南、東南亞抑是任何外國个閩南語。台語就是台語，毋是閩南語。阮也根本無愛叫別國儂稱呼怹个語言是台灣話。
伊一方面不准阮个話獨佔「台」个名，來忽視台灣客家个存在（伊第一段就寫：『我直覺的感觸是「閩南話改稱台語是去客家化」』），一方面閣欲叫阮號做「閩南語」來擴大阮个語族个勢力去到全世界，實在有夠矛盾。
目前不准阮的話號做「台語」个儂，至少有兩種主張方式：
一、不准台灣任何語言直接用「台語」做名。
二、不准阮獨佔「台」个名，怹的語言嘛欲叫做「台語」。
第一種主張相當成功，像羅肇錦教授个言論就是，也是馬朝以來到今[tann]，中華民國政府無變个官方立場。所以教育部其實並無台語詞典、台語拼音，只有「臺灣閩南語常用詞辭典」，佮「臺灣閩南語羅馬字拼音方案」。中華民國小學个母語教育並無「台語」科，只有「閩南語」科，袂輸是為著閩南新娘个囡仔來開設个咧！
第二種真奇怪，怹仝語言个族親，根本無人愛用「台」來號名，但是主張者本身熱怫怫[jia̍t-phut-phut]，一直對阮強調伊講个話也是台語，叫阮著接受。怹連家己人都毋肯，是欲叫阮接受啥？佇語族內已經有共識，才對外呼籲、爭取，按呢才著啊！
Comments powered by Disqus.