「肉」个意思台語普遍講 bah，但是 bah 个本字恐驚毋是「肉」。陳冠學先生主張 bah 就是「茹毛飲血」个「毛」字；另外有儂主張台語 bah 是對蒙古話來个。
「肉」台語文言音 jio̍k，白話音 hi̍k（佮「或」仝音），無論文、白，攏是第八聲。Jio̍k 真平常，像「骨肉 kut-jio̍k」、「肉桂 jio̍k-kuì」，但是 hi̍k 強欲失傳去。
杜建坊先生《歌仔冊起鼓》p.107，引用台南博文堂 1926 出版个歌仔冊《落陰歌》，根據押韻，證明台灣存在「肉 hi̍k」个音：（台羅標音是我另外加个）
『聽到汝說真失德[tik] 恰[khah]慘割娘腳腿肉[hi̍k]
留我呆命無路益[ik] 塊[tè]君汝死恰明白[pi̍k]』
毋過杜先生講：（標音我改做台羅）
『現今台灣「肉」字，皆音 bah，「hi̍k」已於中年層消失，僅保存於老年層特定「俗語」中，如「落街打肉」（蘆洲）（潘 標音：lo̍h-kue phah-hi̍k），「雷鳴驚蟄，一手懸魚，一手懸肉」（鹿港）（潘 標音：luî tân kinn-ti̍k，, tsi̍t-tshiú kuǎnn hîr, tsi̍t-tshiú kuǎnn hi̍k），「粿無熟，我買肉）（金門兒歌）（潘 標音：kér bô si̍k, guá bué hi̍k），口語中亦不復存在。』
不過，若照我所知，呂柳仙唸歌有唱一句：「肉身[hi̍k-sin] 朽爛[hiú-nuā] 袂閣來」（月球唱片公司）。另外，我嘛捌聽過阮屏東萬丹一个老拳頭師傅講：「咱儂著是一个肉體[hi̍k-thé]」。所以，杜先生斷定講「口語中不復存在」，無影絕對是按呢。
總是，即種話，現代一般台灣儂正實捎無總[sa bô tsáng]。
歌仔冊文獻內底，「肉」唸做 hi̍k 个，毋但以上迄本，施炳華教授《歌仔冊欣賞與研究》p.68 有引用台北周協隆書局 1936年出版，梁松林《三伯越洲訪友新歌》，而且解說：
『伊是姓梁名三伯，甲恁子兒真得力，做人真正有心色，親象同胞親骨或。
「親骨或」的本字是「親骨肉」。肉的讀書音是 hik，與或（hi̍k）同音不同調，用「或」標「肉」的讀書音。』
施教授个音註，有走爭去。「親骨或」就是唸做 tshin kut-hi̍k。「肉 hi̍k」佮「或 hi̍k」完全仝音仝調，攏是第八調、陽入聲。梁松林編个歌仔，有符合我所講个〈台語「四句聯、相褒、唸歌」个格律、押韻規則〉，伊个第四句韻跤，若毋是平聲字，就是第八聲，袂出現第四聲个字。而且「肉」唸做 hi̍k，該當歸屬佇白話音層，毋是讀冊音層。
話尾：
就現代欲應用來講，「肉體」即个詞，應該是唸文言音 jio̍k-thé 卡妥當。我逐擺聽著儂講「青春个肉體[bah-thé]」就會起愛笑，目睭前出現一个 bah-bah-bah 个身軀。
參考資料：
陳冠學《台語之古老與古典》，1981，自費出版；1984，第一出版社；2006，前衛出版社。
陳冠學《高階標準台語字典》p.751，2007，前衛。
杜建坊《歌仔冊起鼓－－語言、文學與文化》，2008，台灣書房。
施炳華《歌仔冊欣賞與研究》，2010，博揚文化。
蒙古語辭典 http://asuult.asuultserver.com/dic/
即篇文貼出來，承蒙杜建坊先生殷勤牽教。「驚蟄」个「蟄」我本標做 ti̍t，今已經佇頭前迄所在照伊指正个改過來（用紅字）。我將伊寫个全文，轉貼佇下跤：
潘老師「肉」个台語音，我有幾个補充意見：
- 「雷鳴驚蟄，一手懸魚，一手懸肉」 「驚蟄」鹿港音是kinn-ti̍ek(ti̍k)；毋是kinn-ti̍t。
- 閩南三邑泉腔「肉」，个俗讀音是「mah4」(鼻化)，無讀bah4；潮州音即是bah4；潮州文讀是nek8。
- 關係「肉」/ hiek8 /个講法，我在《歌仔冊起鼓》雖然講「口語中不復存在」，但是下跤各有一句：
但〈落陰歌〉卻明白記錄「腳腿『肉』」此一口語詞，可見1926年前後台灣泉腔口語「肉」，依然說/hiek8/，歌仔册之語言價值由此可見。
《歌仔冊起鼓》修訂版(2008許陣袂赴印)有另外引一例：
1955年興新出版社有一本〈新歌李三娘〉全八本，作者是艋舺梁松林，根據書中一葩歌文：
【三娘即勸因阿叔 兄妹算來親骨肉 父母命是在傾刻 骨肉至親變仇敵】
證明毋但1926年，一直到1955年台員話益有時行「hiek8」个講法。
「肉」台員讀「hiek8」，歌仔冊以外，我佮早聽着--个，大部分攏是用在俗語；口語極加是一半个人有講，所以我認定只个音，在台員差不多算是絕種矣；毋即講：口語中「不復」存在。潘老師認定「一半个人」亦有準算，按爾我無意見。
若是經過潘老師讚聲了後，只个音詞會當「倒翻箍(to3huan1khoo1)」，變做常用詞，共我个意見徹底推翻，按爾上好！
Comments powered by Disqus.