自主學習

唐宗漢、唐宗浩即對智力非凡个兄弟，無法度忍受台灣个體制教育。怹老母李雅卿毋但將怹對學校中「搶救」轉來厝內「自主學習」，而且聯合一寡仝情形个家長，佇1994年創辦「種籽親子實驗學校」。

阮自細漢讀公民課本，攏知影「國民有受教育个義務」，但是阮無了解即句話真正个意思是「國民著愛予統治者改造頭腦，來穩定政權」。

有李雅卿怹即種儂个努力，國家後來才開放自學，放棄以前強迫入學个惡法。

但是修法了後，地方政府毋但激皮皮，甚至千方百計，刁難、阻擋想欲踮厝自學个囡仔佮家長，包括要求囡仔愛閣轉來學校參加各種考試。

我本來是想，「咁講地方政府是為著欲繼續控制囡仔个思想，來維護政權？」

昨昏下晡聽著黃女士咧講怹兜个經驗，才知影原來遮个縣長、教育局官員、督學、校長、老師，是咧驚仔其他个父母會綴咧做，無愛閣將囡仔送來學校讀冊，煞害怹無學生通教，學校會倒店，怹會無頭路。

遮个體制教育者，上了解一點：來學校讀即種死冊真痛苦、無聊、浪費性命，若無用「公權力」來強迫，啥儂愛來？

「體制」歹扑破，因為伊不只是一陣真少數个統治階級，是親像金字塔个超大型建築。佇金字塔中層个儂，比頂層个儂，閣卡拚死欲保護即个金字塔。

(Facebook 2012-09-30)