咱咧講「東西南北」是唸做 tang-sai lâm-pak，其中干那 lâm 無分文白，其他三字攏有分文言音佮白話音，而且攏講白話音。（若攏用文言音，著變做 tong-se lâm-pok）
但是若地名「台東/台西/台南/台北」，著無共款：Tâi-tang、Tâi-se、Tâi-lâm、Tâi-pak。台西个西[se]嘛愛唸文言音。閣再比較「台東」是白話音 tang，「屏東」卻是文言音 tong。
按呢整理起來，真複雜歹學个款，毋過咱若自細漢攏聽台語、講台語，自然著攏講會準，毋免加想。這著是愛有家庭內自然个母語環境个道理。
話 講倒轉，這毋是表示咱著無需要學校內个台語教育。我做囡仔个時，筋骨著無勇，去藥房開喙共頭家講：「欲買『百安膏』[pik-an-ko]。」無儂共我教，我自然著知影即三字按怎唸，毋過後來閣去買，雄雄想講：即字「百」咁毋是一百箍、兩百箍个百[pah]，按呢著愛唸 pah-an-ko 才著啊，煞tsua̋n花--去，毋知是按怎我進前會講 pik-an-ko。
細漢閣有一擺，毋知因為啥乜代誌，我講：「熱帶[jia̍t-tāi]个儂卡早發育。」阮爸爸聽著，共我糾正[kiú-tsìng]講：「熱帶[jia̍t-tài]」。按呢，針對「熱帶」即个詞个「帶」--字，我知影按怎唸矣。但是一二十年久，著一直停留佇即種坎站，毋知影是按怎我一開始會唸做 tāi，嘛毋知影、無考慮其他相關个字又閣是按怎唸。
這著是因為家庭內个母語教育，並無建立一个有意識个語言智識个系統，無系統化个語言教育，除非是捷[tsia̍p]聽--著，捷講--著个話，汝才學會椆腹[tiâu-pak]，若罕得聽--著、甚至無儂講過个字眼，咱只好靠直覺來唸。拄著有別種強勢个語言（華語）咧干擾，咱對台語个直覺著定定走精--去。
像阮老父按呢，比一般台灣儂父母，實在好太濟咧，聽著囝仔台語發音錯誤，會即時共伊教，毋知各位个父母咁有按呢做？
到甲我大學teh欲畢業以前，運用我佇學校學著个西洋儂發展出來个語言學理論、配合漢語个音韻學，扑拚自修來研究台語。才瞭解台語有本調、變調、輕聲，台語有文白、漳泉、勾破个分別，台語按怎佮華語對應，按呢建立起歸套系統化个台語智識。
迄陣[tsūn]，越頭來回想囡仔時代个疑問[gî-būn]，一時間歸个看甲一清二楚。袂輸是自細漢目睭著生瞖[senn-ì]，tann拆開迄重[tîng]茫霧个膜仔，才發覺世間个景致遮爾明朗[bîng-láng]！
原來台語有真濟字攏有文言音（讀音）佮白話音（語音）个分別，「百」唸做 pik，是文言音，用佇讀古文，或者是書面語、卡抽象[thiu-siōng]、卡學術、心理感受、專有名詞等等咧使用。數量單位詞「百」唸做 pah，是白話音，用佇卡口語、具體、本地在來、身體方面等等。「百」另外閣有 peh 即種白話音，干那用佇「百姓」peh-sìnn/sènn 即个詞。（台灣一般是按呢分，佮福建有出入）
閣再「帶」个白話音是 tuà，親像皮帶、糾帶[kiù-tuà]、…；若文言音著是 tài，親像連帶[liân-tài]、帶念[tài-liām]、寒帶[hàn-tài]、熱帶[jia̍t-tài]、…。因為「帶、代」華語共音，攏是共一種「去聲」，我細漢著是予華語帶衰著，才將台語第三聲个「帶 tài」，唸做第七聲个「代 tāi」。台語「去聲」有分「陰去（第三聲）、陽去（第七聲）」兩種，卡講究、精密。
若無即種歸套个系統智識，汝著無才調徛佇卡峘个角度來反省、觀照汝喙裡講出來个台語。卡深个無論，連一个字袂曉唸，汝都[to]無法度家治去查台語字典，當然愈無可能詳細分辨一寡台語字典所列出來，無共發音个差別佮用法。干那戇戇仔綴[tuè]儂講，嘛毋知別儂為啥乜按呢唸，若毋捌聽過別儂講，只好家治想，家治著[tio̍h]，著袂免得予北京話拖累著，烏白鬥，愈來愈漚[àu]。
以上所論，照我想，不過是基本常識。這毋是我咧賣茶講茶芳、賣花講花紅，咱若對國校仔起，學校著用教「國語」三分一个時間，來教咱系統化个台語智識，十幾年落來，我講个物件，咁毋是成做台灣儂儂攏會曉得个common sense？
有袂少儂主張講：母語只要佇厝內予父母來教著好，學校無應該教、無需要教。講一句無客氣个，即種儂，毋是真不懂[put-tóng]，毋捌語言學術个原理，凊彩nauh-nauh咧；若無，著是大奸雄－－怹有真濟儂佇心肝內，根本是希望台灣話緊去死死咧。
啥儂毋知影，當今台灣个父母，普遍攏無愛對囡仔講母語？面對即種時勢，學校教育存在个意義，並毋是順趁[sūn-thàn]社會个䆀風氣，該當著愛擔起提昇社會文化个責任佮理想，將在地个生活，建立佇堅實[kiant-si̍t]个在地語言个教育基礎頂面。
家庭內个母語教育，會凍予咱自然掌握正確个喙形佮腔調，講台語袂tiáu-tiáu，但是拄著強勢外語个引進，著僫得[oh-tit]會凍培養咱比較、分析[sik]、判斷[phuànn-tuàn]，種種卡抽象个語言運用个能力。
家庭內母語教育，會凍予咱真自然，免了氣力，著聽有路來，講會輾轉[liàn-tńg]。但是按呢咱猶原袂曉讀母語、寫母語。外來个語言，聽、講、讀、寫，四肢健全；咱家治个母語咧？干那有聽佮寫，袂輸一出世著賰一跤一手，這是欲按怎佮儂有比並[phīng]，佇多語文化競爭个現代世界生存會落去？
想欲倚靠外儂个語言，來建立起一个認同自我、認同鄉土，有自信、有尊嚴个人生觀、世界觀，可比是－－
下神託佛直叩頭 [Hē-sîn thok-pu̍t ti̍t khàu-thâu]
海沙搜塗起大樓 [Hái-sua tshiau-thôo khí tuā-lâu]
報頭風湧一下到 [Pò-thâu hong-íng tsi̍t-ē kàu]
崩敗四散亂亂流 [Pang-pāi sì-suànn luān-luān lâu]
------
（補充，台語將「代」唸做 tài 个，親像「代表 tāi-piáu」講 tài-piáu，是泉州腔个變音，泉腔陰去、陽去本調無分，但是變調是有分，只是因為本調無分，有个詞，煞連變調嘛混同去。）
Comments powered by Disqus.