「苦衷」个台語正音？

儂客問講：
苦「衷」ê「衷」教台典單收列一字「衷」標音thiong，我看著ê甘字典和彙音嘛攏單注thiong，但是一般攏講苦tsiong，毋過教台典並無共列做「俗音」。請潘老師開破一下。

小弟答覆：
「衷」台語正音就是 thiong 無錯，阮細漢个時佇電視聽著个縒音是 tiong，佮「中」仝音，因為「衷」个字形有「中」在內。後來閣生出來个縒音是 tsiong，佮「終」仝音，因為受「衷」个華語音 ㄓㄨㄥ 影響，華語音 ㄓ 聲母个字，台語較濟字唸 ts，較少字唸 t。

華語仝音字〔中、忠、衷、終、鍾、鐘〕台語分做：
中、忠：tiong
衷：thiong
終：tsiong
鐘、鍾：文言音 tsiong、白話音 tsing

早期个台語縒音，主要是袂曉唸「鉤破」音，抑是受近形字影響；後期个台語縒音，主要是予華語音帶衰著个關係。

若照中古音韻書个反切，「衷」會使唸 tiong，但是徛佇守護台語傳統个立場，自來个閩台語韻書佮舊文獻，「衷」字攏是唸「他字頭」，也就是唸送氣个 th 聲母，毋是無送氣个 t 聲母。

台日大辭典有收四个包含「衷」字个詞：微衷 bî-thiong、寸衷 tshùn-thiong、折衷 tsiat-thiong、宸衷 sîn-thiong，攏是文言詞，攏是唸 thiong，但是重扑字个網路版台日大辭典佇其中有失覺察个所在，寫做 tiong，請明鑑。另外有儂姓「衷」，也是唸 thiong。

其實目前逐家講台語有用著即字「衷」，一般也只有「苦衷」爾爾，這佇台語連續劇不時出現（攏是講縒音），可能一半擺仔也有儂會講著「折衷」。

「苦衷」即个詞，台日大辭典無收，1911.07 教會公報个台語白話字文章有出現一擺，是精通台、日、英、德語个林茂生博士，伊 24 歲佇京都讀高校个時所寫，儂伊就是唸正音 khóo-thiong。這 掠外，八十幾年間个白話字教會公報並無閣出現「苦衷」（也就是 khóo-thiong 只查著林茂生即篇，khóo-tiong、khóo-tsiong 个講法完全無出現。）伊迄句原文是：

Khó͘-khǹg goán kóng, "Lia̍t-ūi lī hiah hn̄g lâi tha̍k-chheh goán bē kìm-tit tio̍h o-ló lín chì-khì, soà thé-thiap lín ê khó͘-thiong.

（台語漢字改寫：苦勸阮講，「列位離遐遠來讀冊 阮袂禁得著呵咾恁志氣，紲體貼恁个苦衷。）

因為華語時常講「苦衷」，所以戰後个台語，即个詞才綴咧變做較常用。