華語【交代】【掃地】，台語是『交帶』『掃塊』

頂回講過「代表 tāi-piáu」，偏泉腔多數唸 tài-piáu，是因為怹去聲無分陰陽个影響。毋過，華語【交代】即个意思，台語一四界攏講 kau-tài，無講 kau-tāi。台日大辭典寫做「交帶」，斟酌想，伊即種見解真好。我有啥代誌，吩咐汝了，並毋是著變成汝一儂个責成，我嘛愛佮汝「連帶 liân-tài」負責。

以廈門腔做標準个台日典干那收 "kau-tài" 。但是閩南方言大詞典是：廈 kau-tāi / kau-tài、漳 kau-tài、泉 kau-tài。漳、泉攏 tài，顛倒廈門 tāi/tài 兩可。

我咧臆，伊收廈門唸 tāi 即種，是後來照漢字發音个結果。漳、泉攏是 tài，欲解說做古泉腔影響到規个漳州，這卡無妥當。我寧可理解做是「交帶」，毋是「交代」。

閣像華語【掃地】，台語是講 sàu-tè（漢字通寫做「掃塊」），毋是 sàu-tē。若「面子盡掃落地」才是講 tsīn sàu lo̍h-tē。即个 sàu-tè 个 tè，是指「所在、場所」，毋是專門咧講塗跤个「地」，親像「鎮塊 tìn-tè」共款，毋是「鎮地 tìn-tē」。