華語〔打針〕、台語「注射」、閩南語「扑針」

華語〔打針〕，閩南話（包括金門）、東南亞福建話攏講「扑針 phah-tsiam」，但是台灣話毋是按呢講，咱講「注射 tsù-siā」，這是吸收日語个講法，論真較雅氣。

佇台灣若講「扑針」，老輩儂聽無，中年儂聽了會起愛笑，總--是，少年儂可能會講，我就捌聽過親切个店員小姐按呢講過。

伊對別个儂客攏講華語，但是看著我講台語，伊就改講台語，伊个台語已經比市內仝沿个查某囡仔 好足濟矣。

本來「注」佮「射」攏是動詞，「注射」是類義並列複詞，但是台語已經脫離日語，發展出家己个用法，咱講「注一支射」（也有儂講「注一筒[tâng]射）、「注兩支射，一支注肉，一支注血筋」，將「注射」重新分析，變做動賓複詞，「注」是動詞，「射」是名詞賓語，相關个詞親像「預防射 ī-hông-siā」（華語〔預防針〕）、「麻射 bâ-siā」（華語〔麻醉針〕），配合个動詞也是「注」字。

其他个詞：「射針 siā-tsiam」（注射器个針）、「射筒 siā-tâng」（華語〔針筒〕）、「漏射 lāu-siā」（注射 注血筋个時揬無好勢，致使血筋揬破兩空，射藥漏對另外一空出去，造成烏青。這一半原因是護士憨慢，一半原因是患者个血筋較幼、較薄。）