華語將一字多音个現象，叫做〔破音〕，這佇台語个傳統術語叫做「勾破 kau-phuà」（臺日大辭典寫做「鉤破」），kau-phuà 即个名稱也有袂少漢文先生（尤其是佇台灣中部）講做 khau-phuà。「勾破」主要是指一个漢字，因為意義，抑是詞性無仝，致使著讀無仝个聲調來分辨，親像「堅強 kian-kiông」个 kiông 是陽平第五聲，「勉強 bián-kióng」个 kióng 是上聲[sióng-siann]第二聲，兩个「強」意思無仝，著唸無仝聲調來分別。
請注意，即種「勾破」現象，佮台語「本調、變調」个概念完全無仝。「勾破」个調，是單字調本身就無仝，字典必須明確標明，學習者也著一字一字分開記憶。但是「本調、變調」毋是按呢，台語字典攏標記單字个本調爾爾，若是變調有一套明確个規則咧運作，無需要逐字注明變調个時著按怎變，學習者只要掌握背後迄套規則（可能是無意識个自然習得，抑是透過有意識个傳授），就會曉家己變。
閣說明「勾破」號名个由來，古早讀漢文，佇西洋傳教士來以前，當然無羅馬拼音，只有以漢字反切為主个標音法，其實一般个學童，極加是有學呼八音，根本無學反切呼音法，甚至嘛無學呼八音，怹只是綴先生，用唸「讀冊歌仔」个方式來反覆誦讀「白文 pe̍h-bûn」个課本爾爾，所謂「白文」，就是只有本文，無標點、無音注，無解說个經典原文。其中有寡字有勾破音，較高明个先生為著幫助學生，佇遐知影愛讀正確个勾破聲調，就會教怹佇漢字个四角扑一个「鉤仔」來記明著「破讀」，所以才叫做「勾破」。
具體做法就是用筆佇一个漢字个四个角落，選一角，扑一个鉤仔个形體，按照平[piânn/pênn]、上[sióng/siáng]、去[khì]、入[ji̍p]漢字四聲所應該唸个聲調，分別勾佇漢字个左下、左上、右上、右下四个角落來幫助儂分辨迄字是屬佇勾破第幾聲。「鉤仔」个形體差不多像數學集合論「包含」个符號： 左下个平聲、左上个上聲用 ⊂，右上个去聲、右下个入聲用 ⊃。即種做法，傳統个漢文讀冊儂普遍攏知，無限定閩台語。
但是台語有八聲（一般腔第六聲無用著，老派鹿港腔有用著第六聲），按呢頂面所講兩種符號記佇四角就無夠用。所致古早漢文先生閣發展一種補充記法，就是第一聲至第四聲个陰平、陰上、陰去、陰入猶原照頂段所講个記法，分別記佇漢字四角；但是第五聲至第八聲个陽平、陽上、陽去、陽入，佇鉤仔下底加畫一橫，猶原標記佇四个角落，也就是左下是陽平、左上是陽上，記做⊆；右上是陽去、右下是陽入，記做 ⊇。
因為這是教學个輔助，所以正式个刻本出版品，足罕得有標即種勾破記號，但是罕罕--仔也是看會著，以下是清嘉慶14年(1809年)刊本《道德經釋義》內文前幾頁，有注勾破記號个字，我特別加紅框包起來，請注意，紅框毋是原冊所有。伊這毋是特別為閩、台語來印，並無分甲八聲遐爾濟，只有分四聲爾爾。
按呢這對台語儂來講，若是拄著像「夫」有陰平聲 hu，陽平聲 hû 兩个平聲；「斷」有陰去聲 tuàn，佮陽去聲 tuān 兩種去聲，抑是「別」有陰入 piat，陽入 pia̍t 兩種入聲个勾破音，無佇鉤仔下底加橫線來分辨就無法度囉。（以下書影會用得點開起來看，較大張、較清楚。）
「應」佇遮著讀平聲，鉤仔出現佇左下角，若是台語就是 ing，毋是去聲 ìng；「看」佇遮著讀平聲，勾佇左下角，台語文音 khan，毋是去聲 khàn。「喪」佇遮著讀去聲，勾佇右上角，唸 sòng，毋是唸平聲 song；「惡」佇遮是疑問詞，表示反問，勾破平聲，勾佇左下角，唸 oo，毋是唸去聲 òo，抑是入聲 ok。
伊可能為著勾破个記號無愛予儂掠做是斷句个標點，所以佮漢字个筆劃黏相倚。一般若是手畫个勾破記號，往往會略仔離漢字一縫仔。
「眾人所惡」个「惡」佇遮就愛讀勾破去聲，佮頂一頁平聲無仝，所以勾佇右上角，台語唸 òo，也有唸 ònn，解說做討厭。
即頁較濟字。「論」唸平聲，勾佇左下角，台語唸 lûn，佮第四句尾字「門 bûn」押韻，毋是一般个去聲 lūn。「積功累行 tsik-kong luí-hīng」个「行」是勾破去聲，勾佇右上角，毋是唸平聲 hîng。「 好奇」个「好」咱知著唸勾破去聲，所以伊勾佇右上角。「為 uī」勾破去聲，勾佇右上角，毋是唸平聲 uî。「強」勾破上聲，勾佇左上角。「容易」个「易」勾破去聲，勾佇右上角，台語唸 ī, 也有唸帶鼻音个 īnn，毋是「交易 kau-i̍k、貿易 bōo-i̍k」迄个入聲个 i̍k。
以上若無我開破，各位看著即本冊，凡勢仔會掠做遐个勾破記號不過是噴著烏墨个垃圾點咧XD
有印出勾破記號个刊物，我也捌佇現代个經褶裝佛經看著，配合伊个勾破符號，著唸台語，抑是其他完整保存四聲个漢語才會通，若唸華語就時常走爭去。可惜我手頭無即種佛經刊物，若是有看著个先進，拜託報阮一下，感謝。
以上紹介古早儂按怎運用簡便个記號，來幫助學習者分辨勾破音。咱thang知，台語一字多音个情形比華語加足複雜，有幾若種類型，包括文白異讀、漳泉異腔，閣有訓讀音，即種一字多音我攏無算伊是勾破音，獨獨因為意義、詞性个無仝，致到著讀無仝聲調來區別，像頂面所有个舉例，迄種我才共伊歸類做勾破音，按呢來理解、教學較單純。
Comments powered by Disqus.