著愛對「規个情境」來思考台語个表達法

華語：「他今天西裝革履，難不成是要去相親？」

台語：「伊今仔日鞋襪著跤，敢是欲去叫儂阿爸？」
I kin-ná-ji̍t ê-bue̍h tioh4-kha, kánn sī beh khì kiò lâng a-pa?

請注意，以上華台語對照，只是一个大概个參考。毋是欲做意思完全對同[tuì-tâng]个翻譯。

「鞋襪著跤」个「著」是第四聲 tioh，變調變第二聲。「著跤」著是真體面穿佇跤=裡。古早農業社會，老百姓素常褪赤跤，抑是穿草鞋，罕得幾時「穿鞋著襪 tshīng-ê tioh-bue̍h」。若是「鞋襪著跤」，大概著是欲去對看[tuì-khuànn]，按算欲予儂做囝婿、叫儂阿爸。請注意「跤 kha、爸 pa」有鬥句。

「鞋襪著跤」毋知已經流傳幾千幾百年，當然佮西洋風俗傳入來了後才出現个「西裝革履 se-tsong kik-lú」意思無完全對應。但是這根本毋是重點。

重點是著愛對『規个情境』來思考台語个表達方式，毋通做「個別字詞一一對應个華台翻譯」。台語是獨立个語言，也是咱个母語，無應該透過二手个翻譯來表達、理解。現代台語儂，華語个講法攏足熟，台語一直生疏、退化去。欲講台語个時，頭殼內不時攏先puh出華語个表達法，才翻做台語，煞定定為著個別个華語詞台語按怎「翻譯」來咧頭疼，著準揣會著「完全對應」个台語詞，規句講出來猶原鹹tok-tok、𠕇khok-khok，無才調閣按照「規个情境」來表達媠氣个台語。

只有對「規个情境」直接用台語來思考、表達，才有法度保持台語个主體性。若無，著親像不懂个儂所主張个：「將華語文唸做台語，著是台語文學」按呢，毋但台語文學只是新婦仔文學，連咱講出喙个台語，攏變做是先踮頭殼內用華語造句，才設法欲做完全對應，翻譯出來个新婦仔台語。