以下是寫佇中教大BBS (telnet://mse.ntcu.edu.tw) Taiwanese98板面頂峘个文章，讀者對象是台語系个學生。
今旦日上个作品是蔡培火先生 1925 年出版个冊《十項管見》(cap8 hang7 kuan2-kian3)，是全部用教會羅馬字寫个議論文，總共討論十項議題：
第一項、我所看个台灣
第二項、新台灣佮羅馬字个關係
第三項、論社會生活个意義
第四項、論漢人特有个性質
第五項、文明佮野蠻个分別
第六項、論女子个代誌
第七項、論活命
第八項、論仁愛
第九項、論健康
第十項、論錢銀个代誌
網路有真儕相關个資料，請 google 一下，參考看昧(mai7)。楊允言先生个網站有將原文重扑字囥(khng3)起去，毋閣難免有一寡錯誤。
http://iug.csie.dahan.edu.tw/TG/chu/10HKK/10HKK.asp
點入去看，甚至會出聲音讀予汝聽。彼是電腦軟體讀个，無啥自然。
看逐家个反應，我知影我个毋著，無應該一開始著選即種文章予恁讀，這對恁來講，傷深矣。後禮拜我會改用上簡單个話句，一句一句慢慢仔來，予恁讀，閣練習改寫做漢字。
蔡先生个政治立場有予一寡儂批評，毋閣我感覺伊真偉大。伊一生做个代誌足儕，佇日本時代一方面教育台灣儂，一方面向日本當局爭取台灣儂个權益。台語文个教育嘛是伊想卜提昇台灣儂知識水準其中个一項重要空課(khang1-khue3)。
到甲國民黨政府時代，伊猶原繼續奮鬥。別項無論，今旦日台灣會凍有卡親像个捐血組織、制度佮規模，彼是伊先發起个。
伊三十幾歲个時寫个「十項管見」包括「論健康」。對伊一世儂共看起來，咱知影，伊真正有照伊个想法塊行踏(kiann5-tah8)，維持伊家治身心个健康，食到九十五歲。
身為台語系兮學生，咱卜共蔡先生行禮(kiann5-le2)致敬(ti3-king3)，上實在个做法著是好好仔共即本「十項管見」讀．一遍。現此時看卡無，勿失志，一年後閣上網去看昧，兩年後閣試看昧。到汝畢業前，若有法度真自在來欣賞即本冊，按呢汝才算是出師(chut4-sai1)矣。
Comments powered by Disqus.