蔡英文佮馬英九个民調數字

五月十七台灣智庫公佈一份2012年總統大選，蔡英文佮馬英九个民調數字，即份民調真有意思，佇遮簡單分拆一下。

總支持度來論，蔡英文只贏馬英九 0.7%。

蔡英文个支持度，對中部開始贏過馬英九（雲嘉南上峘[kuân]，比高高屏閣卡峘）。愈少年个，愈支持蔡，符合一向个觀察報導，我个解說是，少年儂卡捷上網吸收資訊，網路世界卡開放，黨國機器無才調像傳統媒體按呢去把持[pá-tshî]。

20 至 29 歲儂當中，蔡贏 8 %。但是佇 40 至 49 歲儂，蔡輸 4 %。因為即个年齡是社會个經濟主力，嘛是生活壓力上大，上注重現實个群族。看起來，蔡有需要提出閣卡有力个經濟政策。

受著違反憲政精神个合併選舉个日期影響，一方面，真濟青年儂無方便轉去投票；一方面，佇中國个中年台商顛倒卡方便轉來投票（工業總會估計有 160 萬儂！）。遮減遐加个結果，馬英九有希望將敗勢牽挽過來，煞卡有贏面。

俗語講：千算萬算，毋值著天一劃。[Tshing-sǹg-bān-sǹg，m̄ ta̍t-tio̍h thinn tsi̍t-ue̍h.] 祈禱天公有目，庇佑咱台灣。勿予政客自私个舞弄[bú-lōng]，傷害台灣个民主，阻礙台灣个發展。