記念台語文研究前輩劉建仁老先生

劉建仁老先生，1931 年 9 月 20 日出世，2023 年 9 月 5 日過身， 享耆壽[hiáng kî-siū]九十三歲。

即个消息，我今仔日才看著，想著即位無機會當面請益个慈祥長者， 一向透過網路對我種種个關心佮指教，也有公開--个，也有私訊進行--个， 實在真毋甘。

頂個月底，劉先生閣佇面冊「臺灣話資料交流所」社團，針對林老師稽考「現身」 台語呼音个鋪文來回應，我接落去討論。無疑劉先生个千金替伊來寫講：

「劉建仁正在與死神拔河中，恕暫時無法親自回覆，請見諒。（女兒代為轉達）」

劉建仁先生是土木佮電力方面个專業人士，佇台電做甲處長。伊興趣多元， 退休了後閣為台語个研究付出海量个心力，得著豐富个成果。伊食甲老、學甲老， 八十一歲學會曉上網，將真濟文章傳上網路分享予世間儂讀，伊也積極參與面冊 「臺灣話資料交流所」个討論佮管理。

劉建仁先生个網站是《臺灣話的語源與理據》。

劉先生精通台語、日語、華語、英語，伊雖然無受過語言學个專業訓練， 干焦會凍自修，但是伊所寫个台語考證，有日本學者个精神，頂真閣嚴謹， 有理有據[iú-lí.-iú-kì]，無像一寡民間熱心个台語博士博按呢 kōo 想像力咧畫山畫水[uē-san-uē-suí]。

咱感嘆人生無常，總--是，劉先生一生圓滿，元氣飽滇，九十外个長歲壽， 扑算佇人生个尾站也無啥病疼，安然來別世，往生極樂世界。

感謝劉建仁老先生為台語文个付出佮貢獻，感恩老先生對阮囡仔儂个牽教佮疼惜。

這是劉先生个家屬替伊佇「臺灣話資料交流所」貼出來个，伊一生个簡歷佮訃音[hù-im]： https://www.facebook.com/groups/434167333333483/posts/6568671339883021