蔡同榮先生過往矣，享年 78 歲。伊咧接受記者採訪个時，定定講台語，予咱真呵咾。
若是戰後出世遮个民進黨頭儂，食國民黨个奶水大漢，彼就差濟啦，欠缺台語意識，會講台語是佇選舉場罔講一下，騙票騙票啦。根本都無欲做民眾个好樣，來救咱个母語。
台灣各族个語言攏真重要，而且攏愛趕緊救。
台灣絕大多數儂个母語，有資格成做台灣个官方語言。無做官方語言个少數語言也著有特別个保障、優待、有母語問政權。若提一種外來少數統治者个語言來做「國語」，煞不准在地上濟儂个母語上電視公開做傳播，講按呢對其他个小族群無公平，結局其實是逐族个語言攏總死，獨獨統治貴族个話語高高在上，這是假平等、假民主。
我嘛真歡喜看著有儂佇電視公開講客話、講原住民話（媒體嘛愛栽培語言人材，來做多語字幕，予儂點選）。逐家互相學習，毋是束死佇家庭內，若無，爸母就毋肯佇厝裡教囝講母語，因為一出去外口，就無使用機會。
將台灣儂个母語矮化做「方言」，煞將外來殖民者个話語當做「全台標準語」，這恐驚是予統治者洗腦个不幸。無地位、無尊嚴个「方言」，毋但會全面退出社會，也會快速對家庭內消失，現實个多數台灣爸母早就毋肯教囝講母語啦。
政治力打壓母語个時代，咁真正過去矣？表面上是過去，其實已經內化入去濟濟台灣囡仔个頭腦內。講較白咧，國民黨對台灣儂个洗腦已經成功矣，哪著閣用明顯个手段來壓制？
舊年才發生：一陣屏東師生坐遊覽車去旅行，學校所倩个高雄儂導遊佇遊樂園講台語對學生宣佈代誌，邊仔有一陣台北來个學生囡仔，其中一个聽著，即時用反感个表情口氣對同學講：〔他們幹嘛講台語？〕
當年宋楚瑜做新聞局長，強力執行蔣經國消滅台灣語言文化个政策。現今當然早就開放啦，但是各位看100台有線電視內底，有幾齣台語連續劇？節目个水準先免論，遐个(那些)演員真濟講台語攏臭奶呆。即種開放，已經傷慢啦！
台語連續劇个收視率非常峘(高)，所以根本毋是因為無觀眾，商業電視台才毋肯製作。其中有兩項因素，一項就是媒體經營者，抑是節目部主管，猶原存心欲消滅台灣母語。閣一項因素，就是演員歹揣(難找)。
國民黨禁母語个教育政策，多數台灣父母早就認命接受，攏毋肯教囡仔講母語，少年儂無幾个台語講會輪轉，電視台是欲去佗位揣台語好聽个俊男美女來演台語齣
毋但台語演員歹揣，台語廣播人員嘛歹揣，有台灣意識，台語閣好个廣播人員，比台灣烏熊閣較少
我本來就感覺廣播電台台語主持人台語程度普遍不良，親身去電台教台語了後，才發現問題閣較嚴重！
Comments powered by Disqus.