許丙丁改寫「丟丟銅」歌詞用字正音

出名台語老歌「菅芒花」作詞者許丙丁先生捌借用宜蘭民謠「丟丟銅仔[Tiuh-tiuh-tâng-á]」个旋律，填寫過歌詞。以下引用《台灣歌謠鄉土情》所記个歌詞，但是我將大部份个「塌[thap]字」提掉：

『雙腳踏到啊伊都……哎唷台北市，看見電燈啊伊都……寫紅字。
　人地生疏啊伊都……哎唷來擱去，險乎烏頭啊伊都……撞半死。
　借問公園啊伊都……哎唷對叨去，問著客人啊伊都……我不知。
　拖車走來啊伊都……哎唷拖我去，去到公園啊伊都……摸無錢。
　車夫開嘴啊伊都……哎唷噪佮鄙，腰包無錢啊伊都……坐欲死。
　拖車大哥啊伊都……哎唷免生氣，明年還你啊伊都……母佮利。』

若是書面語个漢字台語音，咱愛骨力查台語字典來確定伊个發音，親像「捷運 tsia̍t-ūn」个「捷」是第八聲，毋是第四聲，毋通唸做「節運 tsiat-ūn」。但是若是口語个漢字台語文作品，咱查字典了後，閣愛運用咱个台語智識來判斷、調整。

像即塊歌个第五段「車夫開嘴噪佮鄙」，查台語字典，「噪」有 tshò 佮 sò 兩音，攏是第三聲；「鄙」是 phí 第二聲，像「卑鄙 pi-phí」。

但是咱看伊歌詞，現現是欲講「車夫開喙用歹話罵儂」，所以歌詞中个「噪」正確个音是 tshoh 第四聲，毋是 tshò。像「某儂真歹喙，磕[kha̍p]袂著就共儂tshoh」，教育部辭典寫「𧮙」。比較「𧮙姦撟 tshoh-kàn-kiāu」个 tshoh，本調是第四聲；但是「砍伐樹木」是「剉[tshò]樹」，本調第三聲。即兩字因為變調了後攏仝音，所以真濟儂分袂清。

歌詞中个「鄙」正確著愛唸 phih 第四聲。phih 教育部辭典寫「躄」（注明是「替代字」），伊有兩條解說：「1. 臉朝下仆倒。2. 跌在地上。」但是伊無收著引申做「罵儂个動詞 "fuck"」即種用法，這是對「面向下、身軀向前，仆[phah]倒落去」聯想過去交合一方个姿勢。

伊歌詞中寫「噪」佮「鄙」，只是借用倚音[uá-im]个漢字來代替，所以請毋通戇戇仔照字典查著个「噪」佮「鄙」个發音來唸。

過去个漢字台語文獻，若無按呢註音解說整理，將來攏會變做「有字天書」，汝捌字，但是字毋捌汝。