有朋友問講，是按怎真濟儂「調查」唸做 tiau-tsa（佮「雕查」共音），但是「民調」煞唸做 bîn-tiàu（佮「民吊」共音）。伊會曉按呢問，著表示伊是內行儂，對台語本調、變調个系統規則有充分个了解，才會意識著即个問題。若一般欠缺台語學基本智識，真無奈个台語青盲牛（會曉講、袂曉寫），只好phīng直覺來唸，可惜，怹个直覺，定定會予華語影響，錯亂去。
「調查」个正 音是 tiāu-tsa。不過，老輩儂个講法，「調查」普遍唸做 tiau-tsa，「調」--字本調第一聲，變調做第七聲。所以拄著「強調」即个詞，「調」佇本調个位置，怹著唸做 kiông-tiau。這大概是因為「調」佮「凋 tiau、雕 tiau」形體接近，所以發生我所講「形倚音縒 hîng#uá#im#tsua̍h」个走音。親像「技 kī」唸做 ki，變做佮「枝、支」共音，亦是共款道理。
台日大辭典有收「調查」，記音做 tiâu-tsa，伊註明是日語借詞。照台日典个廈門腔，寫第五聲抑是第一聲，變調以後攏共款。我是考慮民間咧講「強調」，往往唸做第一聲，閣像「協調」 我細漢聽著大儂攏講 hia̍p-tiau，毋是 hia̍p-tiâu；照按呢「調解委員會」，伊「調」--字變調變第七聲，可見本調應該是第一聲。閣有「風調雨順」，我細漢嘛攏聽儂講 hong#tiau#ú#sūn，「調」嘛是唸第一聲。根據「協調、強調、風調雨順」遮个詞，我感覺民間慣勢將書面語詞出現个「調」--字當做佮「凋、雕」个共音字來唸，本來个 tiâu 佮 tiāu 兩音顛倒卡無用。所以才認為「調查」个頭字，前頭變調變第聲，若恢復本調是第一聲，毋是第五聲。
雖然怹「調」字唸了走音去，但是至少即字佇無共語詞出現个時，怹會凍維持「台語聲調系統性个一致」，按照正確的本調、變調規律來唸－－本調个所在唸第一聲，變調个所在變第七聲。
到甲現代台語儂，「調查」即个日本時代著有咧用个詞，大部份是綴頂輩儂唸 tiau-tsa（嘛有儂唸做 tiāu-tsa），但是「調」出現佇本調个時，若是舊詞，怹會曉講「聲調 siann-tiāu、歌仔調 kua-á-tiāu」，毋過若是新名詞「民調 bîn-tiàu」，「調」煞閣唸做 tiàu ，變成系統真無一致，不但無照該有个本調佮變調个系統規則，平平是本調，有時唸 tiāu，有時閣唸 tiàu。
「吊、調」華語共音，但是台語無共音。「吊」真簡單，著唸做 tiàu，若頭殼內咧處理台語發音个時，不知不覺，受著華語「吊、調」共音个影響，將台語「調」嘛唸做佮「吊」共款，著會出現「民吊」即種音，佮「聲調、歌仔調」个 tiāu 有出入，無統一。
正音來論，「調」照意義差別，有兩个勾破音，tiâu 佮 tiāu 。該唸做 tiâu 个，親像「調整 tiâu-tsíng、烹調 phing-tiâu、調理 tiâu-lí、調和 tiâu-hô」。該唸做 tiāu 个，親像「調查 tiāu-tsa、聲調 siann-tiāu、調動 tiāu-tōng」。
「調 tiāu / tiâu」走縒--去，唸做 tiau，是早年華語勢力猶未入來，台語本身个發展。親像「調查 tiāu-tsa」走音做 tiau-tsa；「烹調 phing-tiâu」嘛走音做 phing-tiau。
「調 tiāu」即个音，出現佇新詞，若走音唸做 tiàu，主要是後來受華語影響个發展，分析佇頂面。
華語「調兵」台語講做「召兵 tiàu-ping」，用無共字。
Comments powered by Disqus.