談馬英九總統就職三週年演說

進前我引用台灣智庫5/17个民調，講馬英九佇雲嘉南地區，嘛佇20-30歲族群，輸蔡英文上濟（參看：蔡英文佮馬英九个民調數字）。三工後馬總統就職三週年記者會，伊著專工走去台南大學舉辦演說，現拄現是欲搶救即部份个選票。結果伊是按怎咧救選票？開一張7447億个新支票，講欲建設南部，真迷儂。

但是伊2008年有關建設台南个政見十幾條，一條都無做，連上簡單个，廢止新市、白河收費站伊嘛做袂到（南部收費站離足近，減北部十幾公里，真無公平），人民一再陳情，伊攏馬耳東風[má-ní tong-hong]。伊一句話都無檢討過去个政見是按怎做袂到，煞閣繼續咧畫大餅騙票。

閣卡可笑个，是佇治國理念，伊講伊上重視「主權、人權、環境權」即三種主體價值。即三年來，台灣有無數百姓咧抗爭个，正是即三項權利，即陣煞變做伊个執政成果咧品hông聽？！

成語新解
馬耳東風：馬英九總統將人民个抗議、陳情，攏當做是涼爽个東風，一陣一陣[tsūn]吹過伊个耳邊，親像塊呵咾伊真𠢕[gâu]真緣投。

註：官方關係馬總統即場演說个報導評論（？），請看中央廣播電台新聞網〈馬英九總統就職三週年演說彰顯的意義〉。