諍拼音

見若過--一半年仔，著有一陣愛台灣个儂跳出來媒體頭前相諍台語个拼音系統。有時分做兩爿[lióng-pîng]，有時拆做三tu，佇遐掰手面 [pué-tshiú-bīn]，看姻个動作，比塊看武俠電影卡精彩，霧 sà-sà 霧。

想起我讀研究所一年下學期个時，學校內台灣研究社个社長阿標=a 真好意，來鼓舞我開一个台語班，講真久我 tsiah 允伊。教一學期了後結束，代誌過真久，想 tio̍h 足見笑，教了太差咧，講傷儕理論，攏無實際个練習，誠害，我真對不起迄幾十个hiah-ni̍h有心來學習个學生佮老師。

理論佮實際即兩爿[nn̄g-pîng] 擔頭[tànn-thâu] 真 oh-tit 媵[thīn] 會拄好重。即幾年我塊教電腦、教台語，tsuăn 愈來愈重實際，愈無愛講理論，講 he 學生有聽哪無聽，無彩喙。

卡講嘛著看坎站，看對象，看時間。初學 [tshoo-ha̍k] =个，二十一世紀个少年儂，一禮拜上一咧兩節，講講一堆理論是卜創啥？

不而過，看著即幾工，儂佇 BBS 塊討論台語拼音个問題，予我對理論个價值閣略仔恢復一點仔信心。

勿用「理論」即个詞啦，改用「原理」卡好講。汝若毋捌「台語个原理」，只是有看過袂少台語冊，學過袂少拼音法，著卜佮儂相諍拼音系統个好 bái，he 是無 koh-iūnn 干那搰力看健康雜誌，綿爛 píng 藥典，著卜佮儂相諍講叨一種藥仔卡對某儂个症頭。

無捨施 [bô-siá-sì]！現時佇遐青筋脹頷 [tshinn-kin tiùnn-ām] 塊駁喙 [poh-tshuì] 个儂內底，即款=个閣袂少。

閣卡食力=个，姻毋但台語个原理無通，姻早前所學个華語、英語个智識只是「通俗解說」，姻根據 he 所推想 [tshui-sióng] 出來个華語、英語个原理，佇一寡關重 [kuan-tiōng] 个鋩角 [mê-kak]，煞攏走精去。閣再用迄寡走精去个觀念來設計、評判 [phîng-phuànn] 台語个拼音，講姻迄套上通，上好教、好學。

Tann...，我是非常慚愧 [tshâm-khuì]，予儂講我是語言學个專業人士。窮真 [khîng-tsin] 我本底所學--著个，是 tsiâu 少仔 niā-niā，十外年過，學--來遐个，十分有八九分攏還予老師去矣。

總是，若照我閣偆落來迄 sut 仔知捌 [tsai-bat] 來講，予儂罵甲臭頭个中研院迄寡學者所擬 [gí] 出來迄套，有影我是卡傾向 [khing-hiòng]。

原理、原理，是按怎台語个原理會 hiah-ni̍h 微渺深奧 [bî-biáu tshim-ò] 咧？是按怎姻攏講第一聲會變第七聲、七變三、三變二、二閣變轉來一，佇遐塊天理循環咧？是按怎姻攏講第八聲會變第四聲咧？是按怎姻認為標變調卡簡單、好學咧？是按怎姻攏講教羅佮 TLPA 所標个聲調是本調咧？

我只好暗靜 [àm-tsēnn] 祈禱，迄寡不食人間煙火个學者頭殼內个語言原理，會凍量早播揚 [pòo-iông] 予所有个台灣儂理解。