論台語文朗讀賽

現時各級舉辦台語文朗讀比賽，至少有以下个問題：

一、朗讀文章个摘選[tiah-suán]、整理，無夠點陳[tiám-tîn]、頂真。

二、評判者本身欠鑑定，隨儂扑分，互相之間無探討、無提升。

三、修正朗讀稿个錯誤，欠制度、無效率，恐龍化。

四、評判者講評个見解有錯誤，下層無tè分訴，主辦單位歹勢得失評審，錯誤个智識繼續湠落去。

五、仝一組个評判者，比賽前應該先開會討論朗讀稿个疑難問題，決定處理方式。閣有明文規則無提起个評分細節，也著參詳予好勢。

台語文个專業性，著愛閣相當个年月才建立會起來。現此時，各級（尤其是地方級）个台語文競賽，主辦單位个心態往往閣有一種無尊重專業个淺薄觀念，想講「既然即位師長足𠢕講台語，的確就是合格个台語評審」。

當然，一部份也是因為真正夠格个台語評審有影真僫揣。