為著佇當今社會推捒台文，我咧寫台語文主要攏寫漢字，但是我蓋清楚漢字台文有足濟問題佮困難。
教育部有公告700字个台語推薦用字，也有設一个台灣閩南語常用詞辭典網站。
真濟儂為著欲通過台語認證，抑是語文競賽想欲著等[tio̍h-tíng]，就去死背教育部遮个台語漢字。甚至字音字形比賽个出題者，刁工去迄个網站揣一寡龜龜怪怪、猶未充份討論定案，連出題者家己嘛毋捌个「替代字」來考（替代字毋是本字、正字）。
親像教育部台語辭典，將 ha̍unnh-ha̍unnh（食著無夠熟个芋仔、菜頭个時，迄種口感）寫做「澩澩」；將 hm̍h-hm̍h（恬恬毋出聲）寫做「噷噷」。嘛出現佇考題內。
「澩」个讀冊音是 ha̍k，意思是夏天有水、冬天無水个水泉；「噷」字音 him，康熙字典無收，別種漢語方言用做相唚(kiss)、抑是兇惡个意思。按呢即兩字佮台語白話擬態詞 ha̍unnh-ha̍unnh / hm̍h-hm̍h 有啥關係？出題者揀這來出題，到底是根據啥乜教育理念？
台語擬態詞非常豐富，其中有足濟音，實在揣無適用个漢字，只有使用表音符號才會凍精密記錄、完整傳承。硬鬥漢字已經是錯誤，神祕个出題者閣將即種「假漢字」當做「真智識」來考試，消磨咱儂个精力智慧，實在是藏鏡人。
有一个儂去拜師[su]學刣恐龍。出師[sai]了後，世間已經無恐龍予伊刣，煞無頭路。伊轉去問師父[sai-hū]欲按怎，師父教伊開班去教卡濟儂學刣恐龍，按呢就有頭路矣。
華語文字音字形競賽个出題者，就是靠即種步數咧維持怹佇台灣社會个地位。怹出出一大堆恐龍題目，要求台灣學生互相競爭，愛佇足短个時間內，用手刀刣死即堆恐龍。
咁講咱台語文出題者，嘛著學怹迄種漚步來賺食[tsuán-tsia̍h]？
(Facebook )
Comments powered by Disqus.