「輸儂毋輸陣，輸陣歹看面」个解說佮版本

「輸儂毋輸陣，輸陣歹看面」教育部辭典，即句俗語按呢說[sueh]：『輸給某人無所謂，但在那麼多人中，若排在最後就很難看了。鼓勵人奮發向上，勿落人後。』

總是，這毋但一款解說佮應用法。其中一款是指雖然客觀个條件，包括體力、儂數、財力、地位等等條件較輸=儂，但是主觀个「陣容、氣勢」毋通輸儂，這是用來鼓舞士氣个話。結局可能贏、也可能輸，彼無重要。準做最後輸去，雖敗猶榮，因為氣勢無輸=儂。

閣一款用法，是指實力雖然輸儂，但是臨陣[lîm-tīn]个時，閣較按怎嘛毋愛認輸。可比寄付做善事，伊較好額=我，但是我猶原欲出比伊較濟。閣像儂駛 Bèn-juh (Benz) =ê 來喝場[huah-tiûnn]（拍賣場），我駛裕隆仔，但是我嘛毋願喝[huah]輸=伊。

另外，以前个文獻，即句俗語也有無仝版本，像五字版「輸人毋輸陣」是唸做 Su-jîn m̄ su-tīn，文言音「人」佮「陣」押韻，按呢就有夠。

閣一種講法是「輸儂毋輸陣，輸陣 lān-tsiáu-面」，有儂主張「lān-tsiáu-面」是「難照面 lân-tsiàu-bīn」个變音。著、毋著，佇遮免窮究[khîng-kiù]，咱講「歹看面」就好啦。

也有講「輸儂毋輸陣，輸陣番薯面」、「輸儂毋輸陣，輸陣碗糕面」。