最近塊讀錢穆(cinn5-bok8)先生个《中國文學論叢》，是共學校圖書館借个，聯經出版社《錢賓四先生全集》个版本，學校進即套冊毋知幾年矣，其中即本《中國文學論叢》攏毋捌有儂借過，可能別本嘛是按呢。
我少年時代買个東大出版社个版本，讀大學以後著攏囥佇厝裡，無閣再提出來掀矣。迄陣錢先生益閣佇咧，經過遮爾儕年，伊个「墓木已拱」(boo7-bok8 i2 kiong2)，骨頭好扑鼓囉。哲人已遠 (tiat4-jin5 i2 uan2)，老輩儂做姻去，算來是伊个徒孫个我，對古早儂个學問全然(cng5-jian5)無進益(cin3-iah4)，儂閣一直sam3-tam7落去。高中讀伊个文，虛心受教(hi1-sim1 siu7-kau3)，中年閣讀，已經有一大堆成見，心肝袂平正(penn5-ciann3)矣。
卡早讀，心肝內是唸北京話，即馬讀，是細聲仔唸台語。內底有个文章，是卡純个文言，讀tioh4卡順；有个文章，因為是演講个整理，大體上是文言，不sam2時會puh4出北京話个白話，讀tioh4卡袂順。
我轉去卡早遰个所在，迄間厝敢(kann2)是共儂稅个，即馬有重(ting5)晟格(chiann5-kik4)過，改做公司。彼敢哪是搭鐵厝个兩棧樓，採光無好，日時攏愛開電火。
我直接出現佇二樓，感覺佮卡早个隔間無共款，本來有一个巷路通到茶水間，即馬已經閘起來矣。總共有兩間辦公室，我行入去內底間。一个穿西裝个查甫職員行對我遮來，卜知影我來創啥。我共講：【不好意思，我以前留下一些書在這裡，回來看一下。】我哪講，哪看正手爿个壁邊，手哪比迄兩兮冊櫥仔予看，【大概是一些文學類的書】。我有注意著遐(hia1)个冊雖然無像卡早排甲遐整齊，大概攏閣有照分類，好佳哉有留咧。
另外閣有一个查甫職員行入來，伊卡老資格，知影卡早个情形，共第一个職員交帶講予我去揣無要緊。
彼(he1)是鐵phu2色个辦公冊櫥，兩棧，頂峘棧是通光个玻璃門，下跤棧是鐵phiann2个門，看袂著內底个物件。我个冊種類袂少，留佇遐个大部份是文學、電影个冊，毋閣下跤棧毋知閣有啥麼貨。
我行對冊櫥仔遐，哪想講，我益(iah4)是無夠自信，無對姻講台語，我閣好好仔讀寡冊，看會卡有自信袂。
會記得高中讀錢先生个《師友雜憶》(su1-iu2 cap8-ik4)，內底有講著伊捌夢著peh4起去一个樓閣頂峘，看著冊櫥仔內有一套善本个古冊，後來真正予伊得著。
2006/05/16 補記：
今仔暗來學校圖書館，將《師友雜憶》揣出來看。佇聯經全集版第五十一冊第八十四頁：
『時余雖在小學任教，心中常有未能進入大學讀書之憾。見報載北京大學招生廣告，投考者須先讀章學誠《文史通義》，余亦求其書讀之，至形於夢寐間。一夕，夢登一小樓，所藏皆章氏書，有世所未見者。後二十餘年，余在北京大學任教時，果得見章氏書之為世未見者。亦異事也。』
第一九○頁講著伊佇北大所看著个是章氏遺書家傳个鈔本，包括〈與孫淵如觀察論學十規〉在內二十篇左右是流行版本所無个。
第一九一頁：
『又憶民十以前，余在小學任教，即深喜章氏之文史通義。一夕，忽夢登一小樓，由北面樓梯上，樓外三面環廊，樓中四壁皆書，又有一玻璃面之長方桌，桌面下一小櫃，亦皆藏書。余觀之，乃悉是章實齋書，又多世所未見者。此夢醒來，初不為意。乃二十年後，不意此夢竟有印驗，是亦余一人生平回憶中值得玩味之一事也。』
Comments powered by Disqus.