邱罔舍

「邱罔舍」是台灣民間故事內底一个出名儂。唸做khu22-bong31-sia11，bong31是變調，本調是bong11，是第三聲个。「舍」是對官家抑是富戶子弟个尊稱，所以即个儂叫做khu-bòng。對按呢咱知，khu-bòng个bòng民間攏寫做「罔」--字，毋著。

「罔」是第二聲个，bóng，變調變做bong33，毋是bong31。若寫做「邱罔舍」著愛唸做khu22-bong33-sia11。

即个儂，名叫bòng。抑bòng本字按怎，我嘛毋知，恐驚無漢字，因為bòng是lô聲母b-，一般有漢字thang寫个lô聲母个字是唸陽調，無像即字是唸陰去聲。《台日典》寫做「惘」，扑算嘛是用準个，訓用个寫法。

bòng是白話詞，著是放蕩[hòng-tōng]、無照起工做儂、做事个意思，嘛會使兩字疊[tha̍h]起來講 "bòng-bòng"，「即个儂真bòng」、「即个儂bòng-bòng」。真bòng个儂是 "bòng-sian"。

邱bòng舍个故事，有幾落段佮漳州个「謝靈舍[tsiā-lîng-sià]」共款，民間故事著是按呢，借來借來，無版權个。毋閣，謝靈舍有一寡考秀才發生个笑詼代，台灣个邱bòng舍就kánn毋捌聽過，表現出漳州比台灣卡儕科舉文化。

往過台語電影時代有一个爆笑劇[po̍k-tshiò-ki̍k]个演員，藝名著叫做「邱bòng舍」，嘛叫做「邱仔bòng」。月球唱片公司有共伊灌錄袂少曲盤。Hiàng時台語演員个台語程度比現時有影是天差佇地。佇遮共姻siàu念一下。