重新自學數學

民國七十年代，我讀高中个數學課本，有實驗本佮東華本兩種版本，雖然上課干焦用實驗本，兩套冊到今我攏閣留咧。

東華本第一冊後壁冊皮內底面个白紙頂面有寫一兩逝字：

98/10/25　重讀第二遍
　　　　　  潘科元

今年是民國 111 年，按呢這是我佇十二年前記个矣。

久無摸數學，我連 $\sqrt 4$ 到底是 $\pm2$ 抑是 $+2$ 都無確定矣。我將 $\sqrt{4}$ 舞對 $x^2 = 4$ 个根去矣。頂日仔看著吳秉翰、吳作樂兩位先生所寫个《什麼是數學？》冊裡提起，才知影有袂少學生也是按呢失覺察，總是，會記得當年我並無即个問題咧。

扑算我就是乖乖仔照老師教个去算出答案，過度重複做題，做甲失去對基本定義个反照，離開真濟年閣翻頭看个時，就將兩種倚近个定義糊混做伙矣。

我个心肝底猶是對數學有好奇，有興趣。宇宙若有真理，數學是毋是「理性儂」會使接近真理上近个路徑咧？

我決定欲閣重新自學數學。用即个網誌來記錄淡薄仔心得。