針對台語「一物多名」，抑是「一詞多發音」个現象（親像〔蝌蚪〕、〔百香果〕、〔飛機〕），設使咱欲建議出一兩種講法，來用佇全國性傳播个場合，方便社會快速溝通。在我龜毛儂个土想，毋是單純統計出「現時上濟台灣儂个發音講法」就採用迄種遐爾簡單。
可比 airplane，咱知影絕大部份个台語講法，攏是對「發行機」佮「飛機」變化出來个。即兩个詞，台日大辭典就攏有收，前--者伊注明「國」，表示是日語漢字詞，後--者伊注明是「新」，扑算是當時對中國華語文進口个新語詞。而且伊所標記个音，就是漢字个台語文言音「飛機 hui-ki」「發行機 hui-hîng-ki」。
問題是，現時多數儂咧講，恐驚攏毋是即種「漢字正音」，像「發行機」有講 hue-lîng-ki / hui-lîng-ki / pue-lîng-ki / hue-nn̄g-ki / hun-lîng-ki 等等，「飛機」嘛有真濟儂講做 hue-ki（聽起來像「花枝」）。我先大膽預測，咱踮遮做網路調查个結果，自細漢慣勢講 hui-hîng-ki 个儂一定真少數。
但是若無採用「漢字正音」，是根據統計个多數來選用某一種變體，我咧想，別種變體个儂攏會不滿，吵講：平平是走音，是按怎欲用恁迄種，毋用阮即種？恁个講法，阮聽起來會起愛笑，橫直我就是慣勢按呢講，我報新聞猶原欲繼續按呢報。按呢即種推薦標準，根本無彩工。
所以就 airplane 个例，我贊同就照「飛機 hui-ki」「飛行機 hui-hîng-ki」个漢字音來當做全國傳播个路用，即種音佮各種發音變體其實差無遠，逐家雖然較無慣勢講，但是聽一定聽有，互相之間也較袂相抾怨。
咱咧訓練播音員就著按呢教，共伊提醒講，這只是一種「方便全國傳播个做法」，毋是欲否定各儂个母語，對各地个腔口咱著愛十分尊重才好。
補充：有友志建議講，hue-lîng-ki 會使寫做「飛凌機」，我無同感。
即種日本時代个新名詞，就是照漢字唸台語音，但是因為多數儂無受漢字台語教育，所以是靠口耳相傳，傳來傳去才走音，出現一大堆變體。
咱毋通閣聽音生字，製造出「發凌機」即種新漢字詞來對應 hue-lîng-ki，一方面這並無予儂信服个語源根據，一方面閣增加漢字个台語音，「飛」字只有 hui 一種文音，無應該閣生出 hue 个音來增加學習負擔。
設使 hue-lîng-ki 若欲寫漢字「飛凌機」，請問，講 hun-lîng-ki / hue-nn̄g-ki 个儂欲寫啥？
若欲表現各地、各儂个台語發音特色，就直接寫羅馬字；若欲寫漢字，就寫「飛行機」而且唸 hui-hîng-ki，應用佇全國傳播。這正正就是羅馬字佮漢字个完美配合，來充份記錄佮書寫咱个語言，閣適用佇無仝場合。
咱一定愛有系統化、策略性个思考，毋是紛紛散散，為每一種變體，揣一種漢字來鬥。
Comments powered by Disqus.