陳美珠女士即時唱《十二更更鼓》

出名唸歌藝人陳美珠女士，無準備，臨時看《十二更更鼓》个歌仔冊來清唱，是我聽過上蓋好聽个五更鼓調。佇蕭藤村老師厝裡錄影，宅仔裡有鵝仔來合音 ^_^

美珠姨个喉韻非常優美，是我心目中台灣歌謠个「美聲唱法」，毋是西洋迄種含[kâm]滷卵个唱法，彼無合咱个語言特質。

錄影是對第六葩開始。請注意全部个曲詩，完全符合我對「嚴格个四句連押韻格律」个分析 ， 以下引用是蕭老師按照原冊个用字：

1.　一更更鼓月照山　牽君兮手摸心肝　阿君問娘卜按盞　隨在阿君兮心肝
2.　二更更鼓月照埕　牽君兮手入繡廳　雙人相好天注定　別人言語不通聽
3.　三更更鼓月照門　牽加兮手入繡床　雙人想好有所秧　恰好小種泡冰糖
4.　四更更鼓月照窗　第一相好咱二人　甲君即好所有望　阿君僥娘先不通
5.　五更更鼓天卜光　恁厝爸媽叫食飯　想卜開門乎君返　手岸門屏心頭酸
6.　六更更鼓天拄開　阿娘煩惱君不知　阿君返去恁所在　不知著時兮閣來
7.　七更更鼓天大光　阿娘送君後花園　夯頭一看君去遠　害阮煩惱心頭酸
8.　八更更鼓日卜罩　阿娘想卜去君兜　路頭靴遠行奧到　冥日煩惱在心頭
9.　九更更鼓九落雷　阿君者久無做堆　大聲叫門狗兮吠　小聲加叫緊來開
10.　十更更鼓入哥厝　明明阿娘食著符　別人看無咱看有　為哥來死只工夫
11.　十一更鼓回返來　阿娘煩惱無人知　手舉燈火入房內　按盞甲君分東西
12.　十二更鼓倒落蓆　甲君分開按盞著　日來哀怨驚人笑　冥流目屎透過蓆

閣進一步來看伊按怎調整「五更鼓」曲調个旋律：

第二句、第四句句尾，有時是第一聲高平調（一半字仔是第八聲高短調），但是有時是第五聲低升調。按呢伊旋律欲按怎拗？就是拄著尾字是高調个時（像「酸、兜、堆、開、夫、西、蓆……」），先唱懸音，才閣收束來低音，當做牽尾聲（毋是語言本身个聲調）；若是拄著尾字是低升調（像「來、園、頭、符…」），就對低音牽懸起去，這是語言本身个聲調。

陳美珠、陳寶貴兩位唸歌先，以前捌佇第四台表演過，是典雅正經个傳統唸歌。 後來澎恰恰佮許效舜才模仿怹个外形，推出小丑仔化个「鐵獅玉玲瓏」。