雞捲[ke-kńg]、繭仔[kián-á]

即種台灣食食[tsia̍h-si̍t]真普遍，相片內底寫做「見仔」。台語 kián-á 佮 kiàn-á，拄著後壁个「仔」，前字毋管是第二聲 kián 抑是第三聲 kiàn，變調攏變第一聲（這是特殊變調，叫做「仔前變調」），所以本調煞分袂出來。伊寫「見仔」穩當是借音來罔用个，因為意思完全袂通。

〇 若本調是 kiàn，可能是「kiàn-tsí-bah」迄个 kiàn。有儂想講是「腱」--字，毋過「腱 kiān」是第七聲个字。

〇 若本調是 kián，有一寡可能：

一、kián 可能是「捲 kuán/kńg」个特殊發音，寫做「捲仔」意思會通。

二、可能是「繭仔」。「繭」字音唸 kián 無問題。因為這形體佮「蟲繭 thâng-kián」、「蠶繭 tshâm-kián」差不多，所以才按呢借用。

應該是第二聲無錯，因為有「蝦kián、肉kián、菜kián」个講法，攏是進一步詳細表明包啥乜餡个講法。

楊玉君教授賜教：『投「繭仔」一票，因為古早的節日食品內面有「麵繭」，澎湖嘛有「菜繭」，雖然看起來佮菜包差不多。』

結論：採用第二聲 kián-á，漢字寫做「繭仔」。

這 kián-á 應該比「雞捲 ke/kue-kńg」範圍卡闊，無一定是包雞肉，做法嘛卡濟變化，嘛有素个。當然，恁所看過个「雞捲」嘛可能無包雞肉啦。

有儂講「ke-kńg」愛寫做「加捲」，意思是將「加[ke]」出來个菜，kauh-kauh捲捲起來食。這無通，因為偏泉腔个儂講「kue-kńg」，即个 ke 佮 kue 个腔口對應，只有寫做「雞」字才會通，寫做「加」袂通。

註：「蠶繭」算是卡正式个台語詞，卡口語化个講法有幾若種：khok-á、niû-á-khok、niû-á-kián

圖片提供：王昭華小姐。多謝伊分享相片，嘛因為有伊講起，我才寫出即篇簡單个討論文，感恩。