電腦時代學寫台語文兩種好步數

佇電腦溝通个時代，欲鼓舞台語儂來寫台語文，定著會拄著「輸入台文」个問題。針對無仝對象，有兩種好法度：

一、若是有時間對拼音開始，系統化來學台文个儂，像台語系學生，抑是有決心去上台文研習班个社會人士，咱就建議伊來寫全羅台文，互相通批、發簡訊，保證進步神速。寫出來个台文嘛上自然，袂有「中文羶[hiàn]」。

二、若是會曉倉頡、嘸蝦米、行列⋯⋯即類輸入法个儂，咱就鼓舞伊來扑漢字台文。因為使用即種「拆字素」輸入法，卡袂予華語發音拖累著，寫出「雞母屎，半烏白」个台文。教--个、學--个，互相通批、網路開講，半練習、半開講，一兩禮拜伊个台文就sià-sià叫。

以上攏有大成功个經驗！

問題是，即兩種儂佔全社會真少數。除非咱研究出「台語語音祕書軟體」聽汝講台語，自動替汝輸入，若無，欲推廣台文，猶原愛有「先知傳道」个覺悟佮氣魄。