羅馬字台語文猶原是祕密文

台語羅馬字，二十幾冬來，倚靠少數志士个推捒，雖然會曉个儂是愈來愈濟，總是，對規个台灣社會來講，全羅台文，猶原是火星文、祕密文。

一半也是無奈，一半也是為即種無啥儂捌个文字形式走揣出路，有寡儂會利用這來佇公開个網路頂，書寫怹个祕密心事。無論是對待意愛在心內，閣歹勢對伊講出喙个查埔儂，抑是怨慼凝心，毋敢當面反應个頭家、序大，將心內話用台羅文寫出來解心悶。

橫直迄个對頭主看無，袂直接sia̍p-lāu我个心事予伊知。但是世間猶原閣有一寡儂看有，雖然佮怹無相捌、無熟，但是怹應該攏是愛台灣、疼鄉親个好心儂，按呢我个心情，嘛有一寡「無敗害」个儂會凍來鬥分擔，也是袂䆀[bái]啦。