頭序、踏話頭、抐話頭

（圖片是甘為霖牧師《廈門音新字典》Thâu-sū）

文章、書冊[tsu-tsheh]頭前个序言[sū-giân]，古早台語冊真濟攏是寫講「頭序 thâu-sū」。即種抽象語詞，現代台灣儂真生疏，毋知thang用，知影了後嘛無佮意用。

新一代个台文作者，扑算是對陳明仁先生開始，時行[sî-kiânn]用「踏話頭 ta̍h-uē-thâu」，予現代儂感覺卡有「台語味」。

總是，我感覺多數綴[tuè]咧採用即種講法个台文作者，並無真正了解台語動詞「踏 ta̍h」佇遮，其實有一个無客氣个意涵：『我話 踏進前，先佮恁明呼明唱[tshiàng]，條件先品好个，日後毋通有長短跤話、嫌東嫌西哦！」。

台日大辭典有一寡典型个例：「踏話頭」「話頭 先踏」「條件 踏去真ân」「聲說[siann-sueh] 踏真ân」。

比較起來，卡好禮、過謙[kòo-khiam]个講法，是「抐話頭 lā-uē-thâu」，意思是，先講寡卡無重要个話（親像相借問、天氣寒熱……），帶動氣氛，漸漸才進入正題。

我認為，嚴肅作品，尤其是論文類个序言，猶原應該保留傳統，採用「頭序」个講法。

2012-01-06 補充：我看著最近出个《台語白話字文學選集》，用「話頭」兩字來表示。