體罰个教學真野蠻

有一个議員貼出一段學生寄予伊个影片，是佇教室偷翕老師摃學生个影片。議員即種行為是毋是妥當，佇遮無討論。

總--是，下底个留言，竟然大多數儂攏贊成學生囡仔著愛摃，才是正確、有效个教育。

怹个經驗可能是感覺伊細漢予爸母、老師體罰，對伊一生有幫助，伊需要儂摃，才會做一个成樣个儂，即點我也尊重。

若是我个經驗，中學時代个體罰是我一生个惡夢，傷害我个心理佮人格發展極大，我會使原諒體罰我个老師，但是我袂原諒伊為著分數來體罰个教學方式，我也無容允學校變成合法施行暴力个場所。

台灣法律早就禁止學校體罰，但是猶原有無數家長、大儂支持體罰，學校內也繼續咧體罰。台灣法律是定心酸个就著啦。