「默契」个台語

儂客：「請問潘老師，華語〔默契〕，台語按怎唸？」

潘某：「汝若問我按怎唸，我个回答是，照漢字唸台語音，就是 bi̍k-khè。」

儂客：「這咁是台語？」

潘某：「華語吸收古文『默契』即个詞，唸華語音就變華語；咱个台語仝款會使吸收古文，唸台語音就變台語。古文毋是華語个專利品。」

儂客：「按呢唸，驚仔儂會聽無……」

潘某：「是啊，所謂『國語』其實是一種半人工个語言，而且有規大套个教育系統、傳播媒體來支持，用升學、就業、出版，各種手段來強迫咱去學、去用，每一个台灣儂才學會曉『國語文』。但是台語欲加出一種新講法，就非常困難，無儂敢大聲講出喙，驚東驚西。」

儂客：「喔！阮查某囝欲去參加演講比賽，我驚仔伊講『怹兩儂真有 bi̍k-khè』，評審會無滿意，共阮扣分。毋知咁有較口語个台語講法。」

潘某：「有啊，上簡單就講『怹兩个真峇[bā]』、『怹兩个心肝峇拄峇[bā-tú-bā]』、『他兩个峇峇峇[ba̋-bā-bā]』。單字講『峇』，兩字詞有講『搭峇[tah-bā]』，閣有『bā-sà』。佇遮，單字詞是指具體个物件為主，兩字詞是指抽象个心理狀態為主，但是看情形來變化應用，攏無要緊。另外閣有形容詞『鬥搭[tàu-tah」』會用得。『搭峇』較強調心心相印，『鬥搭』較強調互補性个配合。親像講：我佮伊个性質雖然無搭峇，總是，做工課互相合作，掠長補短，也是會鬥搭。」

儂客：「感謝老師開破指教。」

潘某：「免細膩，這閣有濟濟鋩角，一時講袂得了，華語个默契有真濟用法，頂面个台語詞無夠額來全部對應。最後干焦閣補充一點，「搭峇」毋是「貼肉[tah-bah]」，音差小可，但是用途差真遠，聲調愛準！」