鼓吹

朋友講我是台語文个「捒手 sak-tshiú」。
我講「哈，是鼓吹者[kóo-tshui-tsiá]（毋是 kóo-tshue-tsiá）」。
伊講「講著鼓吹者，我想著生理儂做生理攏講＂鼓吹＂」。
我講『生理場，愈捷講「鼓舞」』。

即个「鼓舞 kóo-bú」，我國中畢業旅行个時，印象極深：

阮去墾丁遊覽，佇賣記念品个所在，看著真濟在地囡仔，有个咧顧擔，有个手捀[phâng]一盒物件，行來行去開聲拜託儂共伊買。怹隨个仔隨个，攏是生理囝、蓮花喙，台語一流水[it-liû-suí]，氣口佮面腔[tshiunn]完全是大儂pān。

也有較細漢个，會共汝sai-nai，我共伊買一項，怹邊--仔另外一个囡仔隨講：「伊共汝鼓舞，汝就共伊買；我共汝鼓舞，汝攏毋共我交關？」

幾十年過去，即馬个恆春囡仔，有足濟，台語已經袂通矣！

佇我个語感，「鼓吹 kóo-tshui」是咧鼓吹理念，毋是欲趁錢。大概因為我細漢个時，予爸母疼命命，怹毋捌予我艱苦著，免像當年恆春个囡仔按呢，出去外口鼓舞觀光客，鼓吹儂客加買--寡。

註：
一、「鼓吹」若唸文言音 kóo-tshui，是動詞，宣傳、勸誘[khuàn-iú]、提倡[thê-tshiòng]个意思。

二、「鼓吹」若唸白話音 kóo-tshue/tshe，是名詞，華語叫做〔嗩吶〕，佮頂面完全無仝款。