今仔日佇面冊鋪三篇：〈台語古早詞 tsing-piàng vs. tsing-piànn〉、 〈台語詞：白飯、清飯〉、〈教典新詞內容撰稿者查網路資料的撇步〉。 攏有轉貼過來新站遮矣。
電台笑詼古改寫
即條笑詼古是對 FM 99.5 雲端新廣播，主持人陳雷（是電台陳雷，毋是歡喜就好迄个陳雷） 遐聽來个。我小可仔改寫一下。
阿元佇台北讀高中个時，攏綴儂講華語，連出去𨑨迌也按呢。 有一擺歇熱伊去和美耍，實在傷熱，就行入去一間「阿如冰果室」， 叫一碗冰豆花來食。
阿如豆花捀倚--來，阿元攑頭起來， 阿如雄雄看著一个伊透世儂未捌看過个緣投尪仔頭， 心肝 tiuh 三下，無張持 tio̍h-tak，煞捙倒豆花， 潑甲阿元滿面全豆花。
阿如歹勢-tang-tang，緊共阿元會失禮，閣提桌布欲共阿元拭面。 阿元緊講：「沒關係，沒關係，ㄆㄟˊ 我一 ㄨㄢˇ 就好。」
阿如聽一下，面仔紅記記，應講：「人家今晚沒空，明晚好嗎？」
阿元講：「那要多ㄆㄟˊ 我幾 ㄨㄢˇ。」
阿如細ka聲仔講：「無論幾ㄨㄢˇ都沒問題。」
Comments powered by Disqus.