2023-07-17日記

加講寡話有補所

細漢个時，有幾擺因為ke講話，用詞不當，致到予大儂責罵。 幾擺過了後，我就變做一个 kiu-kiu-lun-lun 个儂（扑算閣有別種因端）， 無必要个話無愛講。

倚晝收焦衫个時，有一領是媽媽-ê，我判斷會出來是內爿向外， 毋過嘛是閣共伊問一下。伊應講著，按呢披衫較袂褪色。 原來有即種講究，我無問就較無機會知影矣。

利用咱个貧惰骨來學好

讀 12 Rules to Learn to Code，第一條是教儂毋通予「貧惰骨」个慣性(inertia)扑敗， 會使顛倒頭來利用伊幫助咱上進。可比講下班轉來到厝，第一念毋是欲陷落去膨椅， 開影集來看，著共家己講：「我先來學寫程式，20 分鐘就好！」 按呢咱貧惰改變現狀个慣性真有可能會予咱保持學習狀態，繼續一點鐘。

閣來就是養成好个習慣性，可比講踮行事曆个每一日个格仔畫紅線，予伊一日紲接一日， 按呢咱个心肝就無愛看著紅線斷去！