生活記事
風颱過去矣，早起出日、透風，下晡就無啥風矣。摒掃花園仔， 有家母[ka-bió]鬥相共，用兩點外鐘久。
學習台語
批評新教典查詢速度傷慢
今仔日佇面冊連紲鋪兩篇文，批評新教典查詢个反應速度傷慢，兩篇合做伙佇下底：
新版教育部臺灣閩南語常用詞辭典變慢矣！
各位教典的愛用者，有感覺新教典顯示查詢結果的反應速度比舊教典較慢無？
因為舊版落線矣，無-tè 通進行新舊版的客觀比較矣，但是感覺是按呢。 若逐家攏佮我同感，按呢就是有影。
另外，咱會使比較「ChhoeTagi 台語辭典⁺ 」佮新教典的搜揣速度。
我先用粗陋[lōo]个碼表算時法，簡單測–一下，可比講： pun3-ki、ke-po5、tsau-that……，每一个詞，新教典攏愛 5 秒以上才會顯示出查詢結果，但是仝一个詞，ChhoeTaigi 免 2 秒就搜出來矣。（佇屏東地區，用中華電信 300M 的寬頻網路）
存[tshûn]天良講，查一个詞愛 5 秒以上才會出結果，無算合格。 若查有猶閣好，若等欲 6 秒才顯示講：「符合 xxx-xxx 有 0 筆」， 彼就真氣惱，試–幾遍仔就袂 kau-hìng 閣用矣！
咱著知影，ChhoeTaigi 的詞庫有 50 萬筆以上，新教典的詞庫才 2 萬 8 千外筆爾爾！可見新教典的搜揣程式佮資料庫閣需要大大「優化」。
補充：若用漢字查，新教典就真緊，也是免 2 秒就出來。 總–是，漢字佮羅馬字的搜揣速度差大碼，也是真無理想。 新教典是將漢字佮台羅攏整合做一个查詢欄位，既然欲按呢做， 著愛確保用漢字查佮用台羅查，反應速度攏差不多，按呢使用者的體驗才會 khí-moo giang。若無，袂輸是無鼓勵人使用台羅來查教典的款。
繼續頂面：關係新教典對待「台語漢字查詢」佮「台語羅馬字查詢」， 顯示查詢結果的反應時間差大碼，後者是前者差不多三倍久（1 : 3）。 這我個人相信只是單純的技術問題，也就是程式寫了無夠好所致， 閣改善一下就好矣。
但是個性較強的台語文志士，恐驚袂按呢想。怹會閣較大聲 tshiàng講：
－－－
教育部閩南語團隊濟濟年來，狗食秫米－－無變的政策就是重視漢字、 輕視羅馬字啦！連新教典嘛配合政策按呢設計：仝一个詞條，咱用羅馬字查， 伊就刁工佇遐 tùn-tenn 欲六秒才 tènn 出來，若用漢字查就免兩秒鐘。台語羅馬字掛數字的符號嘛才二十捅个，漢字無仝的字體幾若千个， 單純的羅馬字佮數字調號欲去資料庫搜揣，用跤頭趺想嘛知影會較緊、袂較慢。 是按怎新教典顛倒慢甲按呢？黃麻布做短褲－－看現現，就是將羅馬字當做新婦仔， 食較䆀的啦！
－－－建議新教典程式設計團隊，這个問題著冗早解決才好。
即篇寫了有淡薄仔刁意故，毋知著講是欲做球予新教典設計者， 或者是欲共𪜶甚至是教典團隊搝怨恨咧？喙有較 tshio，實在歹勢。
編修朗讀稿
共阿如編修（編輯修改）第二篇欲投个朗讀稿，做甲十二點。 私訊佮伊滾笑兼抗議講：即个國寶如，有潘老師通靠就好款，家己毋先查教典， 照教典用字來改稿，煞規篇直接擲予我，害我改規晡。
其實我改伊个稿，有學著真濟教典字，毋比遐个音字選手，我教典字其實無熟。 另外，伊有寫著幾若个詞、音，教典無收著。予國寶如个台語文章个光芒 tshiō luè 到塊， 教典規个面仔青恂恂。
收集教典未收詞
編修阿如大作个過程中，發見袂少教典未收詞。整理一篇貼佇面冊，那寫那抾那濟！ 明仔載才貼過來新站。
學習日語
讀一屑仔 Human Japanese.
學習電腦
重讀一屑仔 Learning Perl 6.
Comments powered by Disqus.