2023-08-10學習日記

今仔日上晏入會議室，坐佇離喇叭上遠个位。 結果別儂有聽著錄音內呼音各樣个所在，有袂少我攏無聽著。

另外，有聽著一个詞「to-iong7-sing3」煞掠叫是「多容性」，原來是「多樣性」。

下昏暗去潮州街一間高級西式素食餐廳食松露燉飯、全素雞卵糕、飲料， 649 箍，包含一成服務費，不止貴。燉飯面頂有鋪「羅勒」(九棧塔類)个生葉仔， 佮燒燒个飯 tshiau-tshiau咧來食，煞苦苦，食了毋值。甜點較好食爾。

結siàu个時，第一擺看著有儂(一个查某囡仔)用巧錶仔咧付錢， 規个錶面變做條碼，伊手攑起來，tu向櫃台，店員用 iPad 鏡頭感應收錢。

有巧錶仔个儂，也會有巧機仔，巧錶仔一般攏愛佮巧機仔連動。