學習台語
聽講最近即擺台語認證，有出一題是叫儂講出三種佮儂聯絡个方式。 考這定著會遭遇著以下个問題：
「外語」佮「外來語」咱台語到底欲按怎面對、定位來擬定語言政策、 教學方針、認證規準？
即馬逐家聯絡，不時嘛咧用 email、用 Facebook、用 LINE、 用 Messenger、用 IG 等等，遮个網路媒介，像 email 有意譯做 「電批」、「電子批」、「電腦批」，Facebook 有意譯做「面冊」， 其他个真濟根本攏直接用外語（英語）來表達。
外語學了較好个台語儂往往是直接講「外語」，顛倒是外語學了無好个， 唸起來就不知不覺變做「外來語」，像 LINE 講 /laɪn/ 就是外語， 講 /lái/ 才是「外來語」。
一方面，咱會使一刀兩斷來規定講：「有符合台羅系統--个， 也就是台羅聲韻調系統拼寫會出來个才是『外來語』，若無就是『外語』。」 像台羅雖然有 /ai/，也有 /in/，但是台羅無迄號 /ain/ 个韻母組合， 無學過外語个台語鄉親，正經是呼袂出即種音，所以 /laɪn/ 著愛算外語。
總是「外語」佮「外來語」時常並無明確个界限，像 LINE 个例， 外語較𠢕个，khiok-sī 絕對袂講做 lái，總--是𪜶講出來个音有可能是佇 「標準英語」，佮台語 lài-ìn 个音兩頭無穩定咧浮動[phû-tōng]。
其他个情形先免論，干焦是台語認證欲扑分數，拄著這，爭議就真大矣。 設使咱規定講「講外語無算分，講台語外來語才有分」， 佇頂段所講按呢个浮動現象个情形下，閱卷者是欲按怎改才好？
按呢若欲規定做「講外語嘛攏有分」咧？問題是這是台語認證， 都毋是英語認證koh-，按呢規定落去到塊，英語好个，佇台語認證个考試 煞較有利，按呢毋是真譀？
以上攏是干焦咧討論「口說」爾爾，若牽涉著書寫，彼有閣較濟問題愛考慮。
生活記事
執行四工个任務完成，下昏暗欲十點轉來到厝。即幾工無電風thang吹， 一直吹冷氣，喙焦喉渴[tshuì ta âu khuah]，規个儂強欲脫水， 灌茶嘛無啥效。佇會議地點个飲水機所入个白茶，轉來厝裡啉tio̍h 竟然感覺較滑潤[ku̍t-jūn]。
Comments powered by Disqus.