學習台語
繼續寫 Iù-tī Khò-pún 第三課个比較，猶未寫完。
姓「曲」台語按怎唸？
阿綠小姐來問我，我才發現，字姓「曲」台語竟然唸 Khiau！ 有三份資料攏唯一唸 Khiau，包括甘字典、台日典、新教典附錄姓名唸法查詢。
但是按呢唸，真驚現代台灣儂袂接受，因為 khiau 是死亡个婉轉講法之一。 叫儂 Khiau--先生，Khiau 小姐，毋捌--个聽著，掠叫咱是咧言語霸凌--儂咧！
我心肝內無反對唸文音 Khiok 就好。總是，咱著尊存姓名个主儂， 若有姓「曲」个鄉親，才拜託賜教一下，請問恁攏按怎唸家己个姓？ 感恩！
姓「白」、「史」台語音
補充兩个「照甘字典佮台日典記載，會予現代台灣儂大著驚个字姓唸法」：
一、白：Bat。無論甘字典、台日典，「白」做字姓，唯一音唸 Bat，第四聲， 不可思議个音！台日典網路台譯版特別佇【白 pe̍h】字目 增加一个義項「姓」， 雖然原冊無。
目前姓「白」个台灣儂，我所知攏自稱姓 Pe̍h。黑人廣播劇團陳山林老師佇一齣 電台布袋戲內底，有一个人物「白文邦」，伊唸 Pi̍k Bûn-pang。
二、史：Sái。無論甘字典、台日典，「史」做字姓，唯一音唸 Sái。
俚笑語：陳林李蔡史[Tân Lîm# Lí Tshuà Sái#]，鄭趙呂劉高[Tēnn/Tīnn Tiō# Lī/Lū Lâu Ko#]。 十个字姓，按呢唸落來，予儂想歪對別種意思去。
「史」做字姓唸 Sái，早就廢捒矣，我所知逐个姓「史」个儂攏自稱姓 Sú（文音）。
小西園許王老師有一齣布袋戲，內底有一个人物出場，講「我姓 Sú」， 後台个儂喝講「姓 Sái」，迄sian 人物就足受氣。可見，傳統布袋戲个年代， 姓「史」个儂就足慼 Sái 即个音矣。
學習日語
讀 JapanesePod101.
學習電腦
讀 Learning Perl 6.
Comments powered by Disqus.