2023-09-11學習日記：一百有算「成[tsiânn]百」無？

學習台語

一百有算「成[tsiânn]百」無？

有儂講台語【成百 tsiânn pah】是倚近但是無夠一百；也有儂講「成百」是一百左右， 可能較ke，也可能較少，總--是倚倚。

這可能是語用上个差別，假使咱只是賭目識，大概估計一下，按呢， 講「成百」就是指大約一百左右。了後真正斟酌 kā 算落去，無論實際是 98 / 99 / 100 / 101 等等个數量，「成百」个講法攏袂予儂批評是錯誤、白賊。

假使咱有先確實算過，按呢若結果是一百，咱就袂講「成百」，是直接講「一百」， 抑是加修飾語「拄好一百」、「拄拄一百」、「一百搭搭」、「足足#一百」。 若超過一百一屑仔，就講「（一）百捅」、「一百出仔」、「一百出頭」。 只有倚近一百，但是無夠一百，才會講「成百」。

以上个數詞「百」也會使換做「十、千、萬、億」等等。

廈英典解說 chiâⁿ 就是講：

to become; complete; almost or about; in round numbers or in rough quantity.

其中佮咱遮所討論个數詞修飾語有關个定義就是 “almost or about; in round numbers or in rough quantity.” 頭前講有先算過个情形，就是對應 “almost”，只是估計一下个情形，就是對應 “about”。

生活記事

去屏東

今仔日去屏東，共家母提軟便佮降血壓个藥仔。

中晝佇勝利星村个「小孩吃素」食一盤 I-tá-lih-麵，佮一杯烏龍奶茶。 麵濫素肉醬，略仔較鹹，猶袂歹食。轉--來煞落瀉，無siá-sì。

電子鍋 蓋个開關閣重耽矣

9/3 害去，提去電器行換新零件，今仔日閣害去矣，一爿个榫頭斷去个款。